CEBU, Philippines - Patay ang usa ka gikatahapang tulisan ug naangol usab ang laing kauban nga misukol sa mga polis nga nag-checkpoint human sa ilang pagtulis sa 23- anyos nga dalaga alas- 11 pasado ang takna kagahapon sa gabii sa dalan A.S. Fortuna sa barangay Banilad, dakbayan sa Mandaue.
Ang namatay mao si Richard Caborda, 36, taga Punta Prinsesa sa barangay Labangon, dakbayan sa Sugbo samtang naangol ang kauban niini nga si Roger Bacarisas, 28, taga Tisa sa barangay Labangon sa maong dakbayan.
Nagsakay og motorsiklo ang duha ka tulisan dihang ilang naagian ang biktima nga si Ann Francis Torreon, 23, taga Holy Family sa barangay Banilad ug gilabni ang shoulder bag sa biktima.
Ang duha mipabulhot pagpadagan paingon sa dalan Banilad sa dakbayan apan wala sila makabantay nga dunay mga polis nga nag-checkpoint.
Si SPO1 Renato Canja sa kapolisan sa Presinto 3 sa Mandaue City Police Office (MCPO) nga nakahinabi sa Banat News miingon nga ang team sa kapolisan nga gipangulohan sa ilang deputy chief nga si Inspector Rey Delos Santos maoy nagpahigayon og checkpoint sa maong dapit.
Ang mga polis nagbutang og mga blocking teams sa unahan sa mga dalan diin sila nag-checkpoint nga maoy mobabag niadtong dili mohunong o kadtong moikyas.
Matud pa ni Canja nga samtang nagpadayon sa pag-inspection ang ilang kauban sa mga motorsiklo namatikdan sa ilang kauban ang kalit nga pagbalik sa agi sa usa ka motorsiklo ug miliko sa pikas dalan.
Sa pagliko sa pikas eskina sa maong dalan wala gihapon kini makaugpo tungod kay gisugat man sila sa laing grupo sa mga polis nga nag-atang usab sa pikas eskina sa maong lugar.
Ang duha nga nakamatikod sa mga polis mipadayon na lamang sa ilang pagpadagan apan gipabulhot kini pag-abot sa checkpoint ug ang backrider matud pa kalit nga namusil sa mga polis.
Si Canja miingon nga swerte na lang kay walay naigo sa mga polis ug dihang gibawsan sa mga polis naigo ang dughan ni Caborda nga nakaingon sa kamatayon niini.
Ang kauban ni Caborda nga si Bacarisas dali usab unta nga milanit sa iyang armas nga kalibre .22 apan napusilan kini sa paa hinungdan nga gidakop ug gidala sa tambalanan.
Matud pa ni Canja nga pipila ka gutlo nga nakalabay nahidangat usab sa maong lugar ang biktima nga babaye nga gitulis sa duha nga migukod usab sakay sa taxi ug positibo niining giila sa duha nga nitulis kaniya.
Nakuha nga ebidensiya sa duha ka tulisan mao ang shoulder bag sa biktima, kalibre .9mm nga pistola uban sa unom ka bala ug kalibre .22 gikan sa mga tulisan. (BANAT NEWS)