CEBU, Philippines - Nagkasabot na ang kagamhanan sa Pilipinas ug ang Moro Islamic Liberation Front sa panagtigom nga gihimo niini sa Kuala Lumpur Malaysia kagahapon sa alas 4:45 sa hapon.
Matud pa sa Philippine Information Agency nga sa sulod sa usa ka tuig milampos ang panagsabot-sabot kalabot sa Annex on Normalization of the Framework Agreement on the Bangsamoro.
Mihilak sa kalipay ang Kalihim sa Office of the Presidential Adviser on the Peace Process Sec. Teresita ‘Ging’ Quintos-Deles, Chairman Miriam Coronel Ferrer, ug si Usec Yasmin Busran-Lao.
Matud pa ni Deles nga dili lalim ang giagian sa maong panel aron lang makab-ot ang kasabotan tali sa duha ka habig apan giisip niya kini nga dakong lakang alang sa kalinaw.
“It has been a very difficult road arriving at this major milestone of the peace process,†sumala pa ni Deles sa pamahayag niini sa Official Gazzette.
“Lastly, we acknowledge with deep gratitude our Malaysian facilitator, Tengku Dato Abdul Ghafar, together with his hard-working secretariat, and the government of Malaysia for their hospitality and fraternal guidance, as the third-party facilitator for the peace talks,†dugang ni Deles.
Ang annex on normalization, mao ang giya sa duha ka habig alang sa pagbungkag na sa armadong pwersa sa MILF ug uban pang private armies sa Bangsamoro area, mao kini ang kataposan sa upat ka annexes nga maglangkob sa framework agreement.
Ang usa sa sensitibong annex sa power sharing napirmahan sa duha ka habig niadtong Disyembre 8, 2013, nga naglatid sa gahom sa Bangsamoro Ministerial Government ug ang gahom sa national government magpabilin.
Ang maong mga annexes maoy tamdan sa Bangsamoro Transition Commission alang sa pandayon nga Bangsamoro Basic Law nga mag-agi sa Kongreso dayon ipaagi sa plebesito.
Miabot og upat ka pangulo sa nasod, siyam ka chairman sa panel usa nakab-ot ang kasabotan tali sa kagamhanan ug sa MILF. (BANAT NEWS)