Agaton wa makapakgang sa mga deboto

CEBU, Philippines - Bagyong Agaton wa kaayo makatarog sa dakbayan sa Sugbo kagahapon apan dunay duha ka lungsod nga gikatahong nag-landslide tungod sa padayong pag-ulan-ulan. 

Bisan pa sa hulga sa bagyong Agaton nga gibana-bana nga ang sentro niini sa alas 4:00 sa hapon kagahapon nga naa sa 185 km silangan sa Hinatuan, Surigao del Sur o 305 kilometro sa habagatang silangan sa dakbayan sa Surigao wa gyud kini makapakgang sa mga deboto sa Sto. Niño sa pagpakita sa ilang pagmahal sa Batang Hesus.

Si Josephine Abella, taga barangay Busay sa dakbayan sa Sugbo miingon nga matag tuig mokuyog gyud siya sa prosisyon bisan pa man maglain ang panahon.

Kagahapon, bisan pa man nga naghulga si Agaton iya gihapong gidala ang iyang 4-anyos nga anak tungod kay nagpasamalat siya sa Sto. Niño nga iyang gihatag kaniya ang iyang anak nga iyang gipangayo. Samtang ang hepe sa Cebu Provincial Police Office Sr. Supt. Noel Gillamac mideklarar og full alert status sukad pa niadtong miaging semana tungod sa dautang panahon.   (BANAT NEWS)