Uwan wa panumbalinga sa mga deboto

CEBU, Philippines - Bisan sa pag-uwan, liboan ka mga debotos ang  misalmot sa tinuig nga Walk With Mary ingon man Traslacion isip tipik sa kasaulogan alang sa Fiesta Senyor. Miabot sa 35,000 ka tawo ang miapil sa Walk With Mary samtang 30 ka sakyanan ug 80 ka motorsiklo ang misalmot sa Traslacion, matud ni Chief Inspector Wildemar Tiu, hepe sa Waterfront Police Station 3.

Ang Traslacion, usa ka Espanyol nga pinulungan nga nagpasabot pagbiyahe, mao ang pagdala sa imahe sa Sr. Sto. Niño ug Birhen sa Guadalupe ngadto sa National Shrine of St. Joseph sa Mandaue City.

Mibiya ang convoy sa Basilica alas-7 sa buntag ug naabot kini sa Mandaue alas 10:30 diin gipahigayon ang Traslacion mass didto sa National Shrine of St. Joseph, diin usab ipahigayon ang vigil hangtud na sa fluvial procession nga ipahigayon karong buntag sa Sabado.

Gikan sa Basilica, ang convoy misubay sa D. Jakosalem St., General Maxilom Avenue, Gorordo Avenue, Archbishop Reyes Avenue, Blessed Pope John Paul II Avenue (kanhi San Jose Dela Montana), M. J. Cuenco Avenue sa Cebu City ngadto na sa barangay Subangdaku sa Mandaue City, agi sa Tipolo Highway, Guizo paingon na sa simbahan sa Mandaue City.

Ang matag balay ug buhatan nga maagian sa Traslacion nagbutang og altar nga dunay buwak ug imahen ni Sr. Sto. Niño. Sa barangay Mabolo diin naggikan ang orihinal nga tradisyunal nga Sinulog, dunay mga bata nga misayaw dinuyugan sa tambol suot ang  tradisyonal nga costume. Pormal nga gitunol ni Cebu City Mayor Michael Rama ang Traslacion convoy ngadto kang Mandaue City Mayor Jonas Cortes sa utlanan sa barangay Mabolo (Cebu City) ug Subangdaku (Mandaue City). Ang Traslacion gipahigayon human sa Walk With Mary nga gihimo alas -4 sa kaadlawon diin ang imahe sa Birhen sa Guadalupe giprosisyon paingon sa Basilica aron ubanan ang imahen sa Balaang Bata.

Sa dili pa ang Traslacion, gipahigayon ang labing unang Santos nga Misa sa ikasiyam nga adlaw nga gipanguluhan ni Guadalupe parish priest Msgr. Jose Montecillo.

Si Monsenyor Daniel  Sanico nga maoy kura paruko sa National Shrine of Saint Joseph maoy mi-officiate sa misa inabagan nila ni Father Philip Pepito ug Father Camilus Estiso.

Matud pa ni Sanico nga ang Traslacion karong tuiga maoy labing mabulokon sanglit bisan nagbunok ang ulan wala mapakgang ang kainit  sa pagpaabot  sa mga deboto sa Mandaue.

Giisip ni Sanico nga ang Traslacion usa ka pagpanaw sa mga  deboto nga dili mahisalaag sa ilang pagtuo ug duna kini tumong bisan dunay daghang pagsuway nga giagian. (/EIM)(BANAT NEWS)