Dugay pang mahuman ang bag-ong CCMC

CEBU, Philippines - Madugay-dugay pa g’yud ang pag-estar sa mga pasyente sa Cebu City Medical Center (CCMC)  sa Fire Department building sa Natalio Bacalso Avenue nga maoy gigamit karon nga temporaryo nga ospital.

Si Dr. Shwan Espina nga amahan ni Architect Miko Espina nga maoy nagdesinyo sa pagatukoron nga bag-ong CCMC building miingon nga bisan og kasugdan pa dayon ang proyekto maabtan gihapon  sa sunod tuig ang kahumanan niini. Sila si Dr. Espina ug Architect Espina mitambong kagahapon sa sesyon sa Cebu City Council ug mipresentar sa ilang gihimo nga desinyo sa bag-ong ospital nga nagkantidad og dul-an sa usa ka bilyon ka pesos.

Si Konsehal Margarita “Margot” Osmeña, majority floor leader sa Cebu City Council, miingon nga kun magtan-aw ka sa desinyo sa building nga gihimo ni Architect Espina makadayeg ka g’yud kay susama kini tan-awon og private hospital.

Apan si Osmeña miingon nga ang nakaproblema mao nga wala pa’y kwarta ang dakbayan sa Sugbo aron magamit sa pagtukod sa mao nga hospital building.

Basi sa presentasyon ni Architect Espina nasayran nga  ang unahon sa proyekto mao ang pagguba sa CCMC building ug ang pagbalhin sa karsada  sa dapit nga nahimutangan karon sa ospital.

Ang bag-ong hospital building anha tukora sa  tupad sa fire department building ug masakop niini ang karsada nga kabahin sa Panganiban,  hinungdan  nga ang  maong karsada balhinon gikan sa iyang nahimutangan.

Ang dakbayan sa Sugbo   sa pagka karon nakatigum pa lang og mga siyam ka milyon ka pesos sa iyang gilusad nga “peso-peso fund drive” aron madugang sa gastohon pagpatukod sa bag-ong ospital. (BANAT NEWS)