DepEd gusto’g yano nga Christmas party

CEBU, Philippines - Giawhag  ni Department of Education  (DedEd) provincial superintendent Dr. Arden Monisit ang  mga publikong tulunghaan nga dili mopahigayon og bungga nga christmas party karong pasko.

 Kini tungod sa kalisud ug pait nga kasinatian  sa mga Sugboanon human sa 7.2 magnitude nga linog ug bagyong Yolanda kansang mga biktima sa amihanang bahin sa lalawigan sa Sugbo nanginahanglan kaayo og tabang.

 Si Monisit nanawagan sa mga magtutudlo og mga ginikanan nga himoon na lamang nga yano  ang  christmas party sa mga public schools dinhi sa lalawigan sa Sugbo.

 Iya usab nga giawhag nga ang igasto sa bungga nga party mas maayo pa nga  idonar ngadto sa mga biktima sa bagyong Yolanda didto sa amihanang bahin sa lalawigan. (Chester Abadilla/WC)

Sugyot ni  Emit gisupak sa mayoridad

Mayoriya sa konseho sa dakbayan sa Talisay wala’y mouyon sa sugyot ni Konsehal Doroteo Emit nga laslasan  ang  gidaghanon sa  ilang quota   sa job order (JO)  nga  kawani.

Ang matag konsehal sa dakbayan sa Talisay gikutahan  og 50 ka JO, apan  gusto  ni  Emit  nga  himoon  nalang  kining  20. Tungod  kay  makahipos  man  sila niini  og P1 milyon  gusto  ni Emit  nga  idugang  kini  sa ilang  Legislative Assistance Fund  (LAF) alang sa livelihood project ngadto sa mga marginal sector  nga  gilangkoban  sa mga mananagat, senior citizen, grupo sa kababayen-an, mga drayber sa traysikol ug traysikad.

Apan  si  Konsehal Danny Caballero usa sa misupak sa sugyot ni Emit  ug  mipasabot nga ang mga kabus nagkinahanglan  og dinaliang tabang alang sa panginahanglanon sa ilang pamilya.

Sa laing bahin, si Talisay City Administrator John Yre De los Reyes mibutyag sa Banat News nga sugod niadtong Disyembre 1, 2013 gilaslasan na nila ang gidaghanon sa JO sa city hall,  gikan  sa 2,000 ngadto  sa 1,400 nalang.

Midugang  si De los Reyes nga padayon pa silang  manaktak  sa  mga  ligoy  nga  JO.  (BANAT NEWS)