Sidewalk vendors sa Colon ug downtown area wagtangon

CEBU, Philippines - Ang tawo nga gisaligan ni Mayor Michael Rama pagpanindot pagbalik sa downtown area sa dakbayan sa Sugbo misugyot nga wad-on g’yud ang mga sidewalk vendors diha sa dalan Colon ug ubang duol nga mga karsada.

Si George Chiu, ang gitugyanan sa mayor alang sa pagpatuman sa iyang Downtown Revitalization Project nga gitumong aron pagpanindot pagbalik sa kinapusorang bahin sa dakbayan sa Sugbo nabalaka nga kun magpadayon ang sitwasyon karon sa downtown area hayan nga wala na g’yuy mga kustomer nga mamalit sa mga baligya sa tindahan diha sa maong dapit.

Gipasabot ni Chiu nga kun mobukas na ang dagkong tindahan nga  gisugdan na pagtukod sama sa Robinsons sa North Reclamation Area ug ang higante nga Mall sa SM Prime Holdings Incorporated diha sa South Road Properties (SRP) makapasamot sa kamingaw sa mga tindahan sa downtown.

Matud ni Chiu nga dili siya anti-vendors apan iyang napanglantawan nga kabahin sa pagpanindot sa downtown area mao ang pagbalhin sa mga naninda sa aseras sa laing lugar kay mao kini ang nakapalaksot tan-awon sa mga aseras.

Sugyot ni Chiu nga ang mga sidewalk vendors adto balhinon sa Carbon Market kun mahuman na ang pagtukod sa Unit II building.

Kun makuha na ang mga sidewalk vendors diha sa downtown hugtan na g’yud ang kampanya nga wala na’y tugotan pa nga makapaninda diha sa aseras, ilabi na sa Colon.            Gibutyag usab ni Chiu nga wala siya makagusto nga daghan kaayo sa mga sidewalk vendors naninda og mga “pirated” kon kinopya nga mga discs. (BANAT NEWS)