PDEA-7 official nanghagad og pinusilay sa reporter, nag-sorry

CEBU, Philippines - Opisyal sa Philippine Drug Enforcement Agency 7 gipasanginlan sa usa ka reporter sa radyo nga nanghagad og pinusilay kaniya human giingong nasuko nga gipangutana kalabot sa alegasyon sa usa ka sakop sa National Bureau of Investigation-7 nga mironda sa usa ka panimalay nga way search warrant.

Ang maong opisyal giila nga si PDEA-7 deputy director Esperidion Javier nga gi-interbyu sa kanhi reporter sa Banat News nga si Guam Logroño ug reporter  karon sa DySS Super Radyo Cebu.

Apan matud pa nga dihang miadto ang mga tigbalita sa buhatan sa PDEA 7,  gipangita dayon sa maong opisyal si Logroño kay nasuko kini nga gipasanginlan siyang nanghagad og pinusilay.

Sa interbyu kaniya ni Super Bobby Nalzaro sa Balitang Bisdak kagahapon iyang giklaro nga nasaypan lang pagsabot ang iyang pamahayag ug wala siya’y intensyon nga pasipad-an si Logroño o si bisan kinsang molupyo sa Sugbu.

Si Logroño sa iyang bahin gibati og kabalaka sa iyang kinabuhi tungod sa hulga sa maong opisyal.

Nangayo ra hinoon og pasaylo si Esperidion kang Logroño ug kang Nalzaro sa maong insidente.

Apan bisan pa man niini ang PNP Defense Press Corps nga gipangulohan ni Chito Aragon gikatakda nga mohimo og position paper batok sa maong opisyal.

Ang maong position paper magsentro sa gihulagway nilang dili maayong taras sa maong opisyal nga gipakita sa mga tigbalita.

Dugang ni Aragon nga kung may kalagot ug kasuko man gani si Esperidion sa mga sakop sa NBI-7, dili unta niya pahimungtan ang mga sakop sa media nga igo lang naghimo sa ilang trabaho sa paghatod og balita.

Sa laing bahin, si Esperidion mibutyag nga legal nga surveillance operation ang gihimo sa iyang mga sakop kabahin sa reklamo sa usa ka sakop sa NBI.

Matud niya, ilang gipaabot nga mosumitir og pormal complaint ang NBI kabahin sa ilang reklamo batok sa iyang mga sakop. (BANAT NEWS)