Tag-iya sa MLhuillier Pawnshops biktima sad sa looting
CEBU, Philippines - Ang Cebu-based, nga giilang "Pawnshop King" nga si Michel Lhuillier biktima usab sa "looting" human ang iyang pawnshop sa Tacloban City gi-ransack sad sa mga tawo human sa pagkusokuso sa bagyong Yolanda.
Matud niya, duna siya’y ahensya sa sud sa Robinson's Mall sa Tacloban City nga apil sa gi-ransack sa mga tawo ug gilungkab ang ilang safety vaults ug gikuha ang mga sud nga alahas niini.
Hinuon wala ikasuko ni Lhuillier ang gibuhat sa mga looters nga ang tuyo pagkaon ra gyud. Apan ang nangawat sa iyang tindahan gituohan niyang mga kriminal gyud.
Si Lhuillier, kinsa usa ka Honorary French Consul nagkanayon nga nakuha ang mga alahas nga ginama sa gold, diamonds ug nangawagtang ang ubang importanteng dokumento sa maong pawnshop.
Hinuon matud niya, kinahanglan lang gyud siyang mukayod og maayo aron marekober ang nawala nilang mga goods.
Gani sa pagkakaron, mitabang pa gihapon si Lhuillier sa pagpanghatag og relief goods sa mga biktima sa maong katalagman.
Agi og pagduyog sa kasakit sa mga biktima sa bagyo, wala’y Christmas Party nga himuon ang kompanya alang sa ilang 8,200 ka mga empleyado sa tibuok nasud kay ila nalang idonar sa mga biktima ang kwarta nga ilang gastuhon.
Samtang ang iyang anak nga si Monique Lhuillier kinsa usa na ka sikat ug bantogang fashion designer sa Hollywood milusad usab og relief campaign sa America aron itunol sa mga biktima. (BANAT NEWS)
- Latest
