Yolanda hulga sa 125 ka landslide areas
CEBU, Philippines - Ang bagyong Yolanda, ang kinakusgang bagyo sa tibuok kalibotan nga miigo sa Kabisay-an sa miaging Biryernes labing naghatag og hulga sa 125 ka landslide areas ug 26 ka flood prone areas sa rehiyon 7.
Matud pa ni Engr. Al Emil G. Birador ang chief geologist sa Mines and Geo-sciences Bureau (MGB)7 ubos sa Department of Environment and Natural Resources (DENR) nga labing mihumok ug mihaguka ang mga yuta sa mga lugar nga gitawag nga landslide prone areas tungod sa uwan nga dala ni Yolanda.
Bisan ang mga lugar nga bahaanan sa rehiyon, dali ra kaayong mibukal ang kasapaan sa maong mga dapit dihang mibunok ang dili kaayo kusog nga uwan nga dala sa maong bagyo, sumala ni Birador.
Gani midugang siya nga ang dili kaayo kahadlokan ang gikusgon sa uwan nga dala sa maong bagyo nga miigo sa rehiyon 7.
Kay ang nakapeligro ning maong lugar mao ang kusog nga uwan nga sarang motandog sa mga yuta sa bakilid nga dahilionon.
Gawas niini, ang mga sapa usab sa mga lugar nga flood prone, dali kaayong moawas, busa bantayanan sa tanan, matud pa ni Birador.
Iyang gisubay nga adunay 72 ka mga lugar sa Sugbo nga dahilianan og yuta, samtang 5 usab niining maong lalawigan nga bahaanan. Kini mao ang 11 sa Balamban, 5 sa dakbayan sa Toledo; Pinamungahan 1, Asturias 5, Catmon, 12, tanang barangay sa Talisay, Dumanjug 1, Ronda 1 ug 5 sa dakbayan sa Sugbo.
Sa Negros Oriental adunay 21 ka barangay ang nahimutang sa Guihulngan City 5; La Libertad 9, Bayawan City 9, ug Siaton 6,
Sa Bohol, 9 ka barangay; ug Siquijor 23 ka barangay.
Matud pa ni Birador nga ang mga geohazard map niining mga lugara anaa na sa ilang tagsa-tagsa ka barangay nga maoy magsilbing giya sa mga opisyal sa pagpahibawo sa ilang tagi-barangay.
Giawhag ni Birador ang tanang mga opisyal sa barangay nga may delikadong lugar sa landslide ug bahaanan nga mopakatap sa maong mga kasayoran ngadto sa ilang mga konstituwente. (BANAT NEWS)
- Latest
