Mga simbahan sa Metro Cebu motabang sa mga parokya sa Northern Cebu

CEBU, Philippines - Nobenta porsiyento sa mga simbahan sa Northern Cebu ang mga naguba tungod sa super typhoon Yolanda nga miigo sa maong dapit niadtong miaging Biyernes.

Kini matud ni Msgr. Achilles Dakay, media liaison officer sa Archdiocese of Cebu sa interview kagahapon.

Matud niya ilahang gamiton ang mutual aid fund nga ilang nasabotan sa tanang Metro Cebu Parishes aron maoy itabang sa mga naapektahang parokya.

Ang kada parokya dunay gi-assign nga simbahan sa Northern Cebu nga maoy ilang tabangan nga naglakip sa paghatag og mga donasyon sama sa pagkaon, tubig, tents ug uban pa.

Matud ni Dakay kasagaran sa mga simbahan nga naapektuhan wala nay mga atop.

Gihulagway ni Dakay nga “act of nature” ang nahitabo ug wala kaayo niya hatagi og pagtagad ang pamahayag sa uban  diha sa mga social media nga gilabyan lang sa bagyo ang Cebu tungod sa grabeng debosyon niini sa Senyor Santo Niño.

Matud pa ni Dakay bisan ang Tacloban adunay mga debotos ni Senyor Santo Niño, sumala pa niya pagsalig lang sa Kahitas-an tungod kay kini pagsuway lamang.

Sumala pa niya pinaagi niini dunay kaayohan nga makuha gikan niining mga dautang panghitabo  karon kay naa man ang pagtinabangay sa usa’g-usa. (/EIM)(BANAT NEWS)