Deadline sa entries sa “Sugbo Vlog” Challenge karong Disyembre 5

CEBU, Philippines — Gihatagan og kutob karong Disyembre 5 ang mga Cebuano youth vloggers ug aspiring content creators nga mosumitir sa ilang entries alang sa labing unang nga “Sugbo Vlog” Challenge.

Si Cebu Governor Gwendolyn Garcia mipahibawo niini atol sa tigum niadtong Nobiyembre 20 uban sa mga Cebuano vloggers ug mga opisyales sa Sangguniang Kabataan (SK) Federations sa Probinsiya sa Sugbo. Ang tigum gipahigayon diha sa Kapitolyo nga gipanguluhan sa opisina ni Board Member Loren Singco, kinsa niserbisyo isip presidente sa SK Provincial Federation.

Suma ni Governor Garcia segun sa tahu sa Sugbo News nga ang mga partisipante gikinahanglan mo upload sa ilang entries ngadto sa official SK Federation social media pages.

Atol sa meeting gidasig ni gov. Garcia ang Cebuano vloggers nga mo-share sa ilang kasinatian ug insights kabahin sa vlogging, ug motanyag og guidance ngadto sa mga moapil nga SK Federations.

Kining maong inisyatiba gitumong aron makadani og creative ideas alang sa ilang entries sa Sugbo Vlog Challenge, nga nagtinguha sa pag-promote sa youth engagement ingon man pag highlight sa talents sa mga batan-ong lider sa probinsiya.

Gikatahu nga kapin sa P12 million nga kantidad sa infrastructure projects ingon man cash prizes ang nagpaabot alang sa mga mananaug nga SK Federations.

Ang probinsiya nigahin og P12.1 million nga premyo alang sa labing unang SK Sugvlog Challenge, nga ang matag usa sa top 10 winning SK Federations makadawat og dili mominus P1 million worth nga infrastructure projects.

Gidasig sa Kapitolyo ang 51 ka SK Federations sa probinsiy nga mosalmot sa “Sugvlog Challenge”pinaagi sa pagpakita sa unique culture, sustainable programs, tourism spots, ug local attractions sa ilang tagsa tagsa ka munisipalidad ug siyudad pinaagi sa ilang vlogs.

Si Garcia midasig usab sa SK Federations nga awhagon ang ilang mga constituents nga mosalmot ug mosuporta sa maong kalihukan. (BANAT NEWS)