Klase mobalik karong adlawa, P300M pundo kinahanglan aron i-repair sa mga eskuylahan
CEBU, Philippines - Mobalik na ang klase sugod karong adlawa alang sa elementary ug high school sa mga tunghaan sa Cebu, Negros Oriental ug Siquijor, human mibakasyon sulod sa kapin 20 ka adlaw tungod sa miigo nga 7.2 magnitude nga linog kaniadtong Oktubre 15.
Samtang adunay 804 ka classrooms sa probinsiya sa Sugbo nga severely damaged nga nagpaabot pa nga ayuhon kay wala pa ma-release ang funding nga gikan sa Central Office sa Department of Education.
"We already asked P300 million funding from DepEd for the repair of these classrooms. So far, wala pa nagsugod ang repairs kay wala pa na-release ang funding," matud pa ni Arden Monisit, DepEd-Cebu Province schools division superintendent.
Matud pa ni Carmelita Dulangon, ang regional director sa Department of Education-7 nga nahinabi sa Banat News kagahapong adlawa nga ang klase sa Bohol magsugod ugma pang adlawa kay Carlos Garcia Day man karon sa maong probinsiya.
Giawhag usab ni Dulangon ang mga magtutudlo ug estudyante nga mokalma lang ug dili mag-panic kun aduna pay mga aftershocks nga mabatyagan.
"Number one rule, do not panic. Stay calm," matud pa ni Dulangon nga nahinabi sa Banat News. Matud pa ni Dulangon nga adunay ubang tunghaan sa probinsiya sa Sugbo nga mogamit lang una og mga tents isip temporaryo nga classrooms.
Midungag si Dulangon nga ang uban mag double-class ug ang mga non-academic nga rooms sama sa dental clinic, principal's office ug library, himoon lang una isip temporaryo nga classrooms aron di gyud ma balda ang klase.
Matud ni Monisit nga ang mga magtutudlo ug estudyante adunay ipahigayon nga emergency drills sama sa earthquake drills kada quarter aron sila makaandam og unsay ilang buhaton ingkaso adunay kalamidad nga mahitabo atol sa klase. Midungag si Monisit nga kung makita sa mga school principals nga delikado na ang kinabuhi sa mga estudyante, gihatagan na kini og authority sa pag-dismiss sa klase. (/EIM) (BANAT NEWS)
- Latest
