OFW giunay sa pag-umangkon, P250 mil cash ug alahas gikawat

CEBU, Philippines - Giunay og lungkab sa usa ka pag-umangkon ang balay sa iyang iyaan nga balikbayan ug gisakiyo ang kwarta ug mga alahas nga dul-an sa P250 mil diha sa barangay Upper Campo sa lungsod sa Pinamungajan niadtong Martes sa kaadlawon.

Ang suspetsado naila nga si Jhon Claud Sapilan Mata, taga barangay Upper Campo sa lungsod sa Pinamungajan. Samtang ang biktima naila nga  si Amelia Diaz, 53, usa ka balikbayan ug molupyo sa barangay Upper Campo sa lungsod sa Pinamungajan.

Matud pa ni PO1 Ronelo Lawas nga nahinabi sa Banat News nga nadiskubrehan na lang sa biktima nga nawala na ang iyang mga gamit sa alas 4:00 sa kaadlawon dihang nimata kini.

Sumala pa ni Lawas ang biktima gikan sa Pinamungajan Elementary School niadtong Lunes sa gabii aron motan-aw sa resulta sa eleksyon ug nauli kini sa ilaha sa mga alas 10 sa gabii.

Tungod sa kakapoy sa biktima wala na siya makabantay kun nasirado niya og tarong ang pultahan nga gituohang giagian sa suspetsado.

Nawala na ang pitaka, kwentas ug iyang kwarta sa lamesa sulod sa lawak nga naglakip sa P7 mil  ug  $1,200, duha ka singsing nga mobalor og P25 mil ug ang usa ka bracelet nga mokantidad og P150 mil.

Walay laing gidudahan ang biktima tungod kay matud pa dunay nakamatikod nga diha kini sa atubangan sa balay niini nianang pagkagabii. (BANAT NEWS)