84-anyos gidauban

CEBU, Philippines — Napaslot ang tibuok lawas sa usa ka 84-anyos nga lola human siya gidauban sa iyahang umagad nga lalake samtang siya naglaba diha sa Sitio Cambuntan, Barangay Bolinawan, dakbayan sa Carcar niadtong Domingo sa hapon, Enero 5, 2025.

Ang biktima mao si  Lolita Lico-an, biyuda residente sa naasoy nga dapit samtang ang suspek mao si Ignacio Brade Tribunalo, 55, nagpuyo sa Pananghiusa Dos, Barangay Tunghaan, Lungsod sa Minglanilla ug umagad sa biktima.

Usa ka 11-anyos nga batang lalake nga anak sa suspek ug usa ka Cherry Mae Canayon, 27,maoy matud pa nakakita sa krimen.

Sa impormasyon sa Carcar City Police Station samtang nanglaba ang biktima kalit lang nibutho sa iyabng balay ug nagbitbit og itom nga bag ang suspek.

Gikuha matud pa niini ang tumbler nga dunay sulod gasolina ug gibubo kini ngadto sa biktima ug dayon gisilaban.

Napaslot ang tibuok lawas sa biktima maayo nalang ang usa sa mga saksi nga si Chery May mitabang sa biktima aron mapawong ang kalayo.

Dali nila kining gidala sa Carcar District Hospital apan gi-refer sila sa Vicente Sotto Memorial Medical Center.

Giingong personal grudge ang hinungdan nga nabuhat sa suspetsado ang pagdaob sa biktima.

Hinoon, human maka responde ang nadakpan dayon nila ang suspek nga positibong gitudlo sa mga saksi nga maoy nagbuhat sa krimen.

Samtang na-recover sa kapulisan ang mga ebidensiya sama sa itom nga shoulder bag, duha ka tumbler nga dunay sulod gamay nga gasolina, laing tumbler nga dunay sulod 1 liter nga gasolina ug gamay nga plastic bottle nga naa gihapon sulod gasolina.

Gipalawman pa sa kapulisan sa dakbayan sa Carcar ang ilang imbestigasyon labot sa maong hitabo. (BANAT NEWS)