13 KA bag-ong napiling brgy kapitan sa Cordova giproklamar

CEBU, Philippines - Ang barangay election 2013 sa lungsod sa Cordova  giisip nga labing malinawon ug malampuson taliwala sa kabalaka nga mahitabo ang kagubot tungod sa kainit sa panag-atbang sa mga kandidato sa matag barangay sa nahisgutang lungsod.

Kini ang nasayran sa Banat News kang Alvin Maghanoy nga maoy Comelec  election officer sa nahisgutang lungsod sa miaging adlaw.

Naproklamar na hinuon ang 13 ka mga bag-ong barangay kapitan sa mga sakop sa board of canvasser nga gilangkoban sa mga reelectionists ug mga bag-ong nawong.

Naglakip sa naproklamar nga mananaug sa miaging barangay election mao sila si Teoderico Casquejo Jr.,  sa barangay Poblacion, Jose Wahing sa barangay Alegria, Samuel Sumagang sa barangay Bangbang, Magdalino Pinote sa barangay Buagsong, Jesus Rosane sa barangay Catarman, Fracisco Ando Jr., sa barangay Cogon ug Alfredo Ligan sa barangay Dapitan.

Dugang naproklamar nga mananaug sa miaging barangay election mao sila si  Maria Rosa Suan sa barangay Day-as, Selodonio Sitoy sa barangay Gabi,  Melchor Ompad sa barangay Hilutungan, Arnold Paraquia sa barangay Pilipog, Jaime Andolar sa barangay San Miguel ug Chito Bentasan sa barangay Ibabao.

Giangkon ni Maghanoy nga sa  maong  adlaw nga gipahigayon ang piniliay maoy nadawat nila ang mga taho labot sa gialigar nga pagpamalit og boto nga gihimo sa pipila ka mga kandidato.

Gitataw niya nga naandan na gayod kining maong mga aligasyon sa tanan nga mga dapit ang pagpamalit og boto apan walay usa niini nga nadakpan gayod sa akto nga mga politiko o mga lider nga naghimo niini. (BANAT NEWS)