Tanod gisumbag sa suporter sa politiko

CEBU, Philippines - Gilabnihan  sa cell phone  ug  nasumbagan pa  sa suporter  sa politiko  ang usa ka barangay tanod nga nag-record sa diskurso sa  politiko didto sa barangay Panadtaran sa lungsod sa San Fernando  sa miaging gabii. Ang mipasangil  nga  nasumbagan  ug gilabnihan  og cell phone   naila nga si Gomercindo Alfanta, 39, barangay tanod ug molupyo sa barangay Panadtaran sa maong  lungsod.

  Samtang ang suspetsado giila nga si Genes Tanudra Navarro, hingkod,  nga  taga   barangay Panadtaran   ra usab.

Si Alfanta nga nagpa-blotter sa kapolisan miingon nga samtang   iyang  gi-record  ang diskurso ni Rey Canoy, kandidato pagka-kapitan sa maong barangay  atol  sa pulong-pulong giduol kuno siya sa suspetsado. Unya  kalit  lang  nga  gilabni  niini  ang  iyang cell phone ug gipikhan  pa sa kumo  niini  ang iyang  tuong  bahin  sa nawong busa nawingig  siya. Gitambagan sa kapolisan si Alfanta nga magpa-eksamin sa doctor ug mobalik sa estasyon aron moduso sa iyang medical certificate. Samtang sa alas 10:00 sa susamang gabii si Navarro miturn-over sa kapolisan sa cell phone  sa biktima ug miingon nga naglagot  siya  kay  gi-rekord  sa  biktima  ang diskurso  ni  Canoy.

Miingon si Navarro sa kapolisan nga sa pagkakita niya sa gihimo sa biktima iyang giingnan nga hunongon niini ang pag-record apan nasuko hinuon ang biktima ug mipaila sa iyang kaugalingon nga barangay tanod.

Matud pa ni Navarro nga human nakapaila si Alfanta nga tanod, gisumbag siya  niini sa tiyan ug  dihang natagak ang cell phone, iya  kining  gipunit,  matud  ni  Navarro. (BANAT NEWS)