P90 wage increase gipangayo sa ALU-TUCP

CEBU, Philippines - Misang-at ang Associated Labor Unions-Trade Union Congress of the Philippines (ALU-TUCP) og P90 nga wage increase sa tanang mga mamumuo sa Central Visayas diha sa Regional Tripartite Wages and Productivity Board-7.

Sa unom ka pahinang petisyon sa ALU-TUCP , ilang gipasabot ang kamahinungdanon nga dugangan og P90  matag adlaw nga suholan sa mga mamumuo nga naglakip sa nagdawatan nang daan og minimum wage, above minimum wage ug labaw na kadtong wala gyud sweldohi sa tukmang suhulan.

Matud pa nila nga makiangayon lang nga ang tanang mamumuo ang makadawat sa increase tungod kay ang pagsaka sa presyo sa palaliton karon wala moila kung kinsa minimum ug dili minimum wage earners.

"The P90 daily increase is essential if workers are to cope with the increasing prices of commodities and cost of living, if they are to meet the basic needs of their families, even if only partially, and if the country is to give meaning and substance to the policy of equitable distribution of income and wealth," sumala pa sa petisyon.

Dugang pa sa petisyon nga bisan pa man sa paglambo sa ekonomiya sa nasud karon ug misaka ang abot, wala gyud makatilaw ang mga mamumuo sa tinud-anay nga bili sa piso sa mga gipatumang wage increases sukad pa niadtong 1989.

Sumala pa nga tungod kini sa nagpadayong deregulated oil prices, automatic adjustments sa rates of utilities (kuryente ug tubig), ang mga price increase ug uban pa. Gipanglantawan usab nga mosaka og siyam ka porsiyento ang consumer prices sa mosunod pang mga bulan maong kinahanglan na ang  dugang sa suholan.

Gawas sa katuyoan nga madugangan ang suhulan, katungod usab sa mga mamumuo nga mapalambo ang standard of living sa ilang pamilya nga dili magkalisod-lisod.

"Workers have not raised their living standards for living while other sectors have accumulated more and more of the country's income and wealth," sumala pa sa petisyon.

Ang ALU-TUCP maoy kinadak-ang labor federation sa nasud. Matud nila nga nahimo na sa mga mamumuo ang ilang papel sa pagpalambo sa ekonomiya sa nasud, apan ang tagsa-tagsa ka mga pamilya sa mamumuo nagpuyo ubos sa standard of living. (BANAT NEWS)