Mga bentahoso gi-warningan ni P.Noy

CEBU, Philippines - Gipasidan-an ni Presidente Benigno Aquino III  ang mga negosyante nga dili mamentaha sa presyo sa ilang mga baligya tungatunga niining krisis karon tungod sa linog nga miigo sa Central Visayas.

Matud pang Aquino kung madeklarar na ang usa ka lugar nga under state of calamity duna nay price control nga ipatuman ug dunay silot sa mga malapason.

Si Aquino miduaw sa Bohol kaganihang buntag ug milahos dinhi sa Cebu City ug mibisita sa Basilica Minore del Sto. Niño nga naguba ang kampanaryo.

Ang Bohol ug Cebu mideklarar og state of calamity kagahapon sa hapon aron magamit sa ilang mga probinsya ang mga calamity funds. Base sa Republic Act 7581 o Price Act  awtomatiko nga mag-price freeze ang lugar nga gipailawom sa state of calamity.

Gipasalig usab ni Aquino nga paigo ang pundo, mga supplies ug materyales  sa mga dapit nga naapektahan. Giawhag niya ang publiko nga dili mag-panic buying.

Samtang gipanawagan ni Presidente Benigno Aquino ang mga sakop sa media nga mag-amping sa pagbalita ug pagsabwag og impormasyon sa publiko aron dili magbunga og  kahasol ug kahadlok sa katawhan nga walay basehan.

Usa na niini mao ang giinggong gibutyag ni Phivolcs Dir. Renato Solidum nga moabot na og 844 ka mga aftershocks ang ilang natala sukad nga nahitabo ang linog kagahapon.

Matud pa sa pangulo nga sa mga yanong tawo, posibleng maghinobra ang ilang reaksyon ug magbunga og dugang kahadlok kanila.

Apan sa pagkatinud-anay ang kadaghanan sa maong aftershocks nga na-detect sa Phivolcs dili gani mabatyagan sa tawo. (BANAT NEWS)