Duha sa mitulis ug mipusil sa sikyu nadakpan

CEBU, Philippines - Nasikop sa miaging gabii sa mga sakop sa City Investigation Branch sa Cebu City Police Office human makigpinusilay ang duha ka mga suspetsado nga maoy gitudlo nga mitulis ug mipusil sa usa ka gwardiya.

Ang nasikop mao sila si Carlito Igot, 26-anyos nga may kalibre .38 nga may upat ka bala samtang nasikop usab si Marlon Tambalos,30, nga nakuhaan usab og kalibre .38 nga may lima ka bala samtang  nakaikyas si Roxanne de la Cerna.

Sumala pa sa report sa TV5 Aksyon Bisaya, si SPO2 Jeffrey Diola sa CIB miingon nga mipahigayon sila og follow-up operation kalabot sa nahitabo sa gwardiya nga si Alex Ibo nga gitulis ug gipusil sa miaging kaadlawon.

Ang duha nagpuyo sa Bugnay 2 sa barangay Labangon  ug sa pag-abot nila ni Diola sa dapit gikatahong mibunot si Dela Cerna ug mipusil sa mga polis nga misita kanila.

Kini maoy hinungdan nga gibawsan siya sa mga polis apan nakaipsot kini ug bugtong nadakpan si Tambalos. Si Tambalos usab ang mitug-an sa nahimutangan ni Igot ug sa biseklita nga ilang gitulis hinungdan nga nasikop kini ug narekober ang bike. (BANAT NEWS)