300 pamilya namakwit

CEBU, Philippines - Kapin sa 300 ka pamilya ang apektado sa nahitabong paghapak sa dakong bawod nga miigo sa tulo ka barangay sa dakbayan sa Talisay nga maglangkob sa barangay Dumlog, Poblacion ug Cansojong.

Alas- 9 sa miaging gabii  mihapak ang dagkong balod sa dagat sa kabaybayonan sa maong mga barangay, apan wala lang kini dayon panumbalinga sa mga residente tungod kay wala may uwan ug dili usab kaayo kusog ang hangin.

Apan nianang pagkatungang gabii, giingong didto na migrabi ang kadako sa bawod nga miresulta na hinoon sa pagkaguba sa ilang panimalay.

Sa inisyal nga pakisusi sa mga social workers, adunay napulo ka panimalay ang nagusbat tungod sa maong dakong bawod nga mihapak sa ilang panimalay.

Si Mayor Johnny Delos Reyes ug Konsehal Danny Caballero  daling miresponde sa lugar ug mimando unta  sa mga apektadong pamilya nga adto lang una mopahiluna sa mga public schools sa siyudad.

Apan nagdumili sila pagsanong tungod sa kabalakang mangawala ang ilang kabtangan maong ang uban diha lang sa mga sports complexes ug kapilya nangatulog.

Usa sa mga molupyo nga si Emelia dela Calsada mipadayag nga mao kadto ang labing unang higayon nga nakasinati sila og hilabihan ka dagkong bawod nga miguba gyud sa ilang      panimalay.

Matud pa ni Dela Calsada nga bisan dunay seawall wala gihapon kini makapugong sa dagkong bawod.

Giplanohan usab ni Caballero nga pabutangan og suga sa mga pipila ka lugar nga naapektuhan sa maong aksidenti.

Ang Public Information Officer sa Kapitolyo nga si Ethel Natera mibutyag nga  mihatag na og hinabang ang Kapitolyo sa mga pamilya nga namakwit.

Si Talisay City social welfare  officer Felipa Solana nagkanayon nga gibanabanang 297 ka pamilya ang apektado ug namiya sa ilang mga balay tungod kay nasudlan na og tubig sa dagat.

Ang Barangay Poblacion maoy nagrabehan tungod kay  mokabat sa 170 ka balay ang naapektahan ug 95 ka pamilya usab sa Dumlog ug 32 ka pamilya ang apektado sa Cansojong.

Samtang si Poblacion barangay councilor Gabriel Bonjoc nagkanayon nga ang sitio Kalubihan ang nagrabehan tungod sa taga hawak nga tubig sa dagat nga nakasulod sa ilang mga balay. (/EIM) (BANAT NEWS)