DEPP diin kanhi sakop si Tabanao, midalit og pag-ampo, CFBJ ug KBP nangayo’g hustisya

CEBU, Philippines - Mihalad og mga buwak ug pag-ampo ang pipila ka mga sakop sa media ilabi na ang mga kaubanan kaniadto sa gipatay nga tigpamaba sa Philippine Drug Enforcement Agency nga si Jessie Tabanao nga mao ang Defense -PNP Press Corps(DEPP).

Ang pag-ampo gipangulohan mismo sa presidente sa DEPP nga si Chito Aragon diin nagdagkot sila og kandila ug mihalad og buwak inubanan sa paglitok og mga pag-ampo.

Giampo sa grupo ang daling kasulbaran sa kaso ug mahatag ang hustisya sa kamatayon sa ilang kanhi kauban.

Si Chito Aragon nga nahinabi sa Banat News miingon nga gibuhat nila kini agi og pagpakita og suporta sa pamilya ni Tabanao ug aron sa malinawon nga pagpahulay sa kalag niini.

Matod pa niya nga salikwaot kaayo paminawon nga maglipay-lipay ang mga sakop sa media nunot sa selebrasyon sa Cebu Press Freedom Week ug kagahapon gihimo ang annual general assembly sa Cebu Federation of Beat Journalists nga diin miyembro ang DEPP.

“Bati kaayo paminawon nga maglipay-lipay ta sa general assembly kay kung buhi pa ‘to siya (Tabanao) naa man gyud to siya sa assembly,” matud pa ni Aragon.

Gihulagway ni Aragon nga ang pag-ampo gihalad nila alang sa kapahulayan sa kalag ni Tabanao, ang mga kandila nga hangyo nila sa kapolisan nga paspasan ang kasulbaran sa kaso. Ang paghalad sa bulak mao ang paghandom kang Tabanao isip usa ka lehitimong sakop sa media tungod kay ligdong man kini nga tawo.

Samtang gikondena sa Cebu Federation of Beat Journalists (CFBJ)  ug sa Kapisanan  ng mga Broadcaster ng Pilipinas ang pagpusil patay kang Tabanao.

Si Elias Baquero ang mibasa sa resolusyon sa CFBJ sa pagkondena sa maong krimen atol sa General Assembly sa mga sakop niini nga giratipikahan sa tanang sakop kagahapong adlawa.

Ang patay nga lawas ni Tabanao gidala na sa iyang panimalay kagahapon sa hapon sulod sa 30-minutos apan gilahos kini ngadto sa Moalboal diin adto siya ilubong karong Septiyembre 26. (BANAT NEWS)