Pagbaligya’g yuta sa SRP di na mokunsulta sa katawhan

CEBU, Philippines - Si Bise Mayor Edgardo Labella sa dakbayan sa Sugbo miingon nga dili na angay’ng konsultahon pa ang katawhan kun si Mayor Michael Rama motinguha pagbaligya og kayutaan sa South Road Properties (SRP).

Reaksyon kini ni Labella sa pamahayag ni kanhi kongresista Tomas Osmeña nga nagsugyot nga kun si Rama moinsistir g’yud nga mobaligya og kayutaan sa SRP angay’ng isumitir niya kini ug referendum sa katawhan.

Matud ni Labella nga iyang tan-aw dili na angay’ng himoon pa ang referendum kay ang mga konsehal nga naglingkud isip sakop sa City Council mga pinili sa katawhan ug representante sa matag distrito.

Ang argumento ni Labella nga kun unsay mahimong hukom sa mga konsehal susama ra nga mao usab kini ang kabubut-on sa katawhan sanglit sila mga pinili man sa kadaghanan sa mga lumulopyo sa dakbayan.

Si Rama nagtinguha nga makabaligya gayud og yuta sa SRP ang dakbayan sa Sugbo aron magamit pagpatuman og mga proyekto, ilabi na ang pagsulbad sa lunop-baha dinhi sa dakbayan.

Matud sa mayor nga dili tukma ang sugyot ni Osmeña nga unya ra ipadayon sa pagbaligya ang kayutaan sa SRP kun mosaka na ang presyo dungan sa paghuman sa gitukod nga building sa SM Prime Holdings Corporation ug Filinvest Land Inc.

Si Osmeña nagkanayon nga kun daku na ang presyo nga mahimong pil-on og katulo, masiguro na ang libreng pagtungha unya sa mga city scholars kon kadtong mga migradwar sa mga public high schools nga gigahinan og tag P10,000 matag semester sa pagtungha nila sa kolehiyo. (/WC) (BANAT NEWS)