Coop mihangyo donaran sila sa Capitol og yuta

CEBU, Philippines - Gihangyo sa Langub Kalunasan Multi-Purpose Cooperative (LKMULCO) ang Kapitolyo nga idonar na lang ang gipanag-iyang luna nga gitukoran sa ilang buhatan sa barangay Kalunasan, dakbayan sa Sugbo nga ipademolis unta ni kanhi gobernador Gwendolyn Garcia. Ang tsirman sa LKMULCO, Antonio Canoy personal nga mihangyo kang Gob. Hilario Davide III atol sa ilang panagtagbo niadtong Huwebes.

Gipasalig ni Davide nga iyang hangyoon ang Hunta Probinsiyal nga hatagan siya sa katungod sa pagdonar sa maong luna.

Sayo niini si Canoy mipadangat sa iyang suwat kang Presidente Benigno Aquino III nunot sa iyang gireklamo batok ni Municipal Trial Court in Cities Branch 6 Judge Pamela Baring-Uy sa dili makiangayong hukom sa kaso nga gipasaka sa Kapitolyo batok kanila. Si Baring-Uy mitugot sa Kapitolyo sa pagpanag-iya sa luna diin nahimutang ang ilang duha ka andana nga buhatan og poso.

Gani mimando pa ang korte nga paabangon ang LKMULCO sa kantidad nga P500 ang  matag buwan  sa ilang paggamit sa luna sukad   niadtong Oktobre 14, 2010 hangtud sa pagpapahawa kanila apan giapelar kini sa taas nga hukmanan.

Usa sa gikwestiyon ni Canoy mao ang desisyon ni Baring-Uy diin wala tinoa ang rason kung nganong dili ibaligya sa Kapitolyo ang luna nga niuyon na man unta ang hunta probinsiyal sa ilang resolusyon apan wala gipatuman ni Garcia. (BANAT NEWS)