Negosyante natulisa’g dul-an P300 mil cash ug alahas

CEBU, Philippines - Mikabat  sa dul-an P300 mil  ang  salapi  nga nasakiyo  sa wala  hiilhing  mga armadong  tawo  nga  mitulis sa usa ka negosyante sa barangay  Tipolo, dakbayan  sa Mandaue  sa  miaging  gabii.

Si PO1 Allan Bacus sa Investigation Detection and Management Bureau (IDMB) sa kapolisan sa maong dakbayan miila sa biktima nga mao si Elena Lao Tan, 54, minyo, nga taga dalan Tres de Abril sa barangay Taboan, dakbayan sa Sugbo.

Pagpabrika  og  mga  tangke  sa tubig  maoy  usa sa  mga negosyo  sa biktima.

Matud pa ni PO1 Bacus nga nagsakay ang biktima sa iyang multicab  nga gimaneho sa iyang drayber nga si Cristopher Rasonable, 22, nga taga lungsod sa Alcantara.

Si PO1 Bacus miingon nga samtang nagdagan ang  multicab sa dalan M.C, Briones sa barangay Tipolo paingon na sa  ilang  balay  kalit lang kining   gitaparan  sa usa ka  motorsiklo nga  gisakyan  og  duha  ka  lalaki  nga  nagsul-ob  og close type nga helmet.

Dayon  mibabag  kini  sa karsada  hinungdan nga napugos  sa paghunong  ang  multicab.

Nanaog  usab  dayon  ang  nag-angkas  sa luyo  sa motorsiklo  dayong  duol  niini  ngadto  sa biktima nga  nagtion  na  sa  iyang  armas  de fuego  ug  mipahibawo  nga  tulis.

Tungod  sa  kahadlok  sa  sinaw  kaayong  armas, wala  na  kabalibad  ang  biktima  dihang  gipangayo  sa  tulisan  ang  iyang  duha  ka  bag  nga gisudlan sa   cash nga  mikabat  sa  P264,000.30, mga cell phone ug wala  matino nga kantidad sa mahalon nga mga butang niini.

Si PO1 Bacus midugang  nga  labing  mikurog  ang  biktima  dihang  giluthang  sa  mga  tulisan ang  multicab  hinungdan  nga  nabuslot  ang  bongbong  niini, dayong  biya ug  mipabulhot  sa ilang  motor dala  ang  duha  ka  bag  sa biktima.

Si PO1 Bacus miingon nga sa sulod sa multicab nga nalungag   napalgan nila  ang   kabhang sa bala sa usa  ka armas nga wala nila matino ang kalibre. (BANAT NEWS)