Kapitolyo nag-amping batok bogus nga NGOs
CEBU, Philippines - Nagtinguha karon si Bise Gobernador Agnes Magpale nga ipasusi pagbalik ang accreditation sa mga people’s organizations (POs) ug mga non-government organizations (NGOs) sa lalawigan sa Sugbo. Kini nunot sa taho nga daghang mga bogus nga mga organisasyon nga nakadawat og dagkung pundo gikan sa mga Senador ug mga Kongresista.
Hinuon matud pa ni Magpale nga ang lalawigan sa Sugbo mainampingon na kaayo sa pagpagawas og mga pundo ngadto sa mga NGOs human sa nahitabo sa Perdido Lex niadtong 2002 diin nalambigit si kanhi bise gobernador John Henry Gregory Osmeña sa giingong pagwaldas sa P5 milyones nga pondo nga gikan sa Kapitolyo.
Ang Perdido Lex nakakuha og accreditation sa Hunta Probinsiyal sa Sugbo bisan wala igkita ang maong organisasyon.
Matud pa ni Magpale tuyo lang niya nga dunay dugang seguridad ang pag-accredit sa mga NGOs nunot karon sa mga kontrobersiya.
Ang mga accredited nga NGOs kinahanglang mopakita sa hunta probinsiyal matag tuig aron mabag-o ang ilang accreditation.
“Duna gyuy interview, tan-awon gyud ang track record,†matud pang Magpale.
Sa iyang bahin si Bokal Joven Mondigo Jr. kinsa kanhi tsirman sa committee on accreditation miingon nga human sa Perdido Lex, kuti na kaayo ang pagkuha og accreditation.
Gani sumala pa niya nga ang tuyo sa uban sa pagpa-accredit dili aron makakuha og hinabang pinansiyal sa Kapitolyo.( /EIM) (BANAT NEWS)
- Latest
