Kapitan sa mga barko ipatanggong

CEBU, Philippines - Wala makauyon si Vice Mayor Edgardo Labella nga ang mga kapitan sa barko nga malambigit og trahedya sa kadagatan dili tanggongon samtang magpadayon ang imbestigasyon.

Matud ni Labella nga nasayod siya nga lahi ang Maritime Laws kun itandi sa mga balaud sa Land Transportation Office, apan gusto niya nga ma-review sa mga kongresista ang Maritime Laws sa nasud. Si Labella nagpakabana gyud sa mga biktima sa katalagman diha sa kadagatan kay usa siya sa mga survivors dihang ang MV Princess of the Orient nga gisakyan niya paingon sa Sugbo, nalunod sa kadagatan sa Batangas pipila ka tuig na ang nakalabay.

Sa usa ka resolusyon, si Labella miawhag sa kadagkoan sa Philippine Coast Guard ug Maritime Industry Authority (Marina) nga paspasan ang imbestigasyon sa maong hitabo.

Ang kapitan sa laing barko sa Trans-Asia Shipping Lines mitug-an sa mga sakop sa Special Board of Marine Inquiry (SBMI) nga gisugat sa Sulpicio ang barko sa 2Go nga misulod na unta sa bukana sa Parola.

Kagahapon, ang United Kingdom  Foreign Office mipagawas og “strong warning” sa ilang mga citizens nga likayan ang pagsakay og bisan unsang ferry ships dinhi sa Pilipinas.

“Ferries are often overloaded, lack of necessary lifesaving equipment, are not adequately maintained and have incomplete passenger manifests. Storms can develop quickly,” sumala pa sa report sa ABS-CBN News.Com. (Rene U. Borromeo ug report gikan sa Wires/EIM)

CV magkaproblema sa suplay sa kuryente sa 2015

Mas sayosayong makasinati og problema sa suplay sa elektrisidad ang Kabisay-an karong 2015 inay sa nahaunang pangagpas nga unya pa kini mahitabo sa 2019.

Gipahibawo sa Department of Energy atol sa tigum sa Regional Development Council (RDC) 7 Sub-Committee on Power nga magkuwang bali og 60 megawatts ang suplay sa elektrisidad sa Visayas Grid karong Disyembre 2015.

Matud pa ni Lisa Go sa DOE Manila nga kini mosaka pa ngadto sa 70 ngadto sa 100 MW sa Abril hangtud Hunyo 2016; ug 120 ngadto sa 305 MW sa Disyembre 2017 hangtud Disyembre 2018.Gibutyag ni Salimbangon nga atol sa budget hearing sa Kongreso, walay gipasalig ang kalihim sa DOE kung unsay plano niini aron dili masinati ang massive brownouts.

Apan si Go mipahibawo nga adunay umaabot nga mga proyekto nga momugna og 429.6 MW sa Kabisay-an.

Kini mao ang 2 x 135 MW Concepcion Coal-fired Power Plant sa Iloilo; TPC Coal-Fired Power Plant Expansion Project (1 x 82 MW Coal-Fired Power Plant) sa dakbayan sa Toledo City; Nasulo Geothermal Project sa Negros Oriental; Villasiga HEP sa Antique; Asian Energy System Biomass Project sa Sugbo; ug ang 18 MW San Carlos Biomass Project sa Negros Occidental.

Masaligon si DOE 7 Director Antonio Labios nga igo kini nga makasagubang sa kakuwangan hangtud sa 2015.  Matud pa ni Labios nga gawas sa maong mga proyekto, aduna pay dugang umaabot nga planta nga mosuplay og 723 MW nga motubag sa panginahanglan human sa 2015.

Ang National Economic Development Authority 7 officer-in-charge nga si Efren Carreon miingon nga ang kasayo sa panginahanglan sa ekektrisidad nagpakita sa kakusog sa paglambo sa rehiyon.

Nunot niini si Salimbangon miingon nga makalipay ang maong kalamboan ug kinahanglan nga adunay hayag nga kaugmaon nga mahatag.  (BANAT NEWS)