Oil spill gikabalak-ang mokatag sa dagat sa Mactan channel

CEBU, Philippines - Ang 2GO Shipping Company nga maoy tag-iya sa nalunod nga M/V Saint Thomas de Aquiñas nga nalunod sa kadagatan sa Lawis Ledge kaniadtong Biyernes sa gabii mikuha og kompaniya nga mohipos sa mga lana nga gikan sa nalunod nga barko.

Matud ni Angelito Salvio, ang assistant vice president for shipping operations, miingon nga gi-hire nila ang Malayan Towage and Salvage Corporation aron maoy maninguha paghipos sa nagsugod na pag-awas nga mga lana gikan sa barko.

Si Coast Guard Commander Meniel Azcuna miingon nga ang dapit nga nalunoran sa barko nga gidam-agan sa cargo ship sa Sulpicio Shipping adunay giladmon nga kapin sa 100 ka metros nga habog pa sa tulo ka tag-as nga andana sa building.

Nahinangop si Mayor Michael Rama tungod kay nagpakabana ang 2GO Shipping sa kalikupan kay ang lana nga moawas gikan sa makina sa barko makadaut sa kalikupan kun dili maatiman.

Ang Malayan Towage and Salvage Corporation mao usab ang posible nga tahasan sa 2GO Shipping sa pag-ugkat sa nalunod nga barko.

Si Commander Azcuna miingon nga hangtud kagahapon sa hapon wala pa makaduso og marine protest ang mga kapitan sa duha ka barko aron magdetalyi kun nganong nahitabo ang panagbangga.

Ang Second Coast Guard District gikatakda nga magmugna og Special Board of Marine Inquiry nga tahasan sa pag-imbistigar sa maong aksidente.

Ang maong SBMI langkoban sa usa ka Marine Engineer, usa ka Ship Captain, representante sa Cebu Harbor Pilot Association ug sa abogado sa Coast Guard.

Kagahapon ang usa sa mga photojournalist sa The Freeman/Banat News nga si Ferdinand Edralin nga usa usab ka advance diver nakakuha og video sa mi-leak nga krudo gikan sa usa sa mga vent sa maong barko.

Matud pang Edralin, nga sa gilawmong 120 ka tiil ug kakusog sa sulog sa ilawom diin maunlod ang barko lisod  alang sa mga divers ang magpundo og dugay sa ilawom, matud niya nga diyes minutos lang sila sa ilawom ug kinahanglan na nilang mosaka aron makalikay sa disgrasya.

Ang grupo sa Philippine Navy ug Coast Guard frogmen uban sa non-government organization sa Sea Knights nagbutang og life line gikan sa barko padung sa ibabaw aron dunay makapyotan ang mga divers aron dili maanod.  (BANAT NEWS)