LTO giawhag pagsusi sa smoke emission testing centers

CEBU, Philippines - Ang mga konsehal sa dakbayan sa Sugbo miawhag karon sa kadagkoan sa Land Transportation Office (LTO) nga susihon nila ang mga smoke emission testing center kun mituman ba sila sa tukmang lagda pag-test og sakyanan.

Si Konsehal Nestor Archival nga maoy tsirman sa Committee on Environment sa Konseho sa dakbayan miingon nga makadaghan siya makakita nga bisan og ang mga sakyanan nga bag-o pa nga narehistro nagbuga gihapon og itom nga aso.   Ang mga sakyanan sa dili pa dawaton sa pag-renew sa iyang rehistro kinahanglang isumitir usa kini og smoke emission test aron pagsuta kun ang gibuga niini nga aso gikan sa makina wala  molapas sa sukod. Nagtoo si Archival nga adunay ubang accredited emission testing centers nga pangwarta ray giapas og papasahon lang ang sakyanan bisan og wala na kini makatuman sa balaud. Ang mga sakyanan nga magbuga na ug itom kaayong aso, ilabi na ang mga trak de-karga ug mga passenger jeepney (PUJ) nga migamit og krudo maoy sagad magbuga og itom nga aso.

Matud ni Archival nga angayang estriktohon gyud sa kagamhanan ang pagpatuman sa smoke emission test aron dili kini makadaut sa panglawas sa mga tawo ug sa kalikupan.

Ang konsehal nagkanayon nga kun giestrikto pa sa pagpatuman ang maong balaud sigurado siya nga napuo na ang maong mga sakyanan nga nagbuga og itom kaayo nga aso samtang nagbiyahe diha sa karsada. (BANAT NEWS)