May sipyat ang midwife sa Badian

CEBU, Philippines - Adunay  sipyat  ang midwife sa birthing center sa lungsod sa Badian   sa pagbalibad  niini  sa  ginang nga manganakay ,  hinungdan  nga  didto  kini  manganak  sa traysikad  ug namatay  ang  bata.

Matud ni Dra. Laksme Legaspi, Assistant Regional director sa Department of Health ( DOH)-7 atol sa interview sa Bantay Radyo   nga gidawat lang unta sa mga midwife ug wala balibari ang maong ginang .

Kini  aron mahiling ang kahimtang niini ug  gipapahuway  sa maong angkanan unya kun masuta nga angay kining ibalhin, una pa i-refer sa district hospital sa lungsod.

Gipasabot ni Dra. Legaspi nga bisan og normal delivery lang ang makayang atimanon sa mga birthing center apan gikinahanglan usab nga abi –abihon ug dili balibaran ang bisan kinsang manganakay nga modangop.

Kini  tungod kay magsilbi man nga health provider ang mga angkanan sa  mga  manganakay.

Gihimong sanglitanan ni Dra. Legaspi nga ang mga birthing center   nga mao nay gitahasan pag-atiman sa tanang mga babaye nga magsabak gikan sa pre-natal niini hangtud na pagkompleto sa immunization niini ug pagpanganak.

Hinuon matud ni Dra. Legaspi wala pa sila’y nadawat nga report sa maong panghitabo ug gipasalig niya nga maapil kini sa ilang mga hisgutanan aron  dili  na  masubli  ang maong panghitabo.

Ang maong pamahayag ni Dra. Legaspi misukwahi sa pamahayag ni DOH-7 Regional Director Asuncion Anden   kinsa  sa sayo  pa  mitataw nga standard operating procedure (SOP) sa mga birthing center ang gihimo sa midwife  ilabi  na kay 7 ka bulan kon premature ang delivery sa bata.

Samtang hangtud kagahapon wala pa gyud mopatim-aw og balik ang magtiayong Regina ug Benjamen Javierto sa buhatan sa Badian Police   Station aron pagkompleto sa imbistigasyon sa hitabo  ug  sa  pagpasaka og kaso batok sa midwife nga si Ma. Beatriz Vasquez ug staff nga si Luzviminda Bruce.

Matud ni PO3 Josefina Beriarmente dihang nahinabi sa Banat  News wala silay kasong mapasaka kun dili  mobalik sa ilang buhatan ang magtiayon alang sa paghikay sa mga affidavit  niini. (/WC) (BANAT NEWS)