Negosyanti gikawata’g dul-an P2 milyones sa bata

CEBU, Philippines - Dul-an sa P2 milyones nga  balor  sa  mga butang  nahanaw  sa usa ka negosyanting babaye human kini kawata sa usa ka menor de edad.

Kagahapon sa hapon, miduaw sa buhatan sa Theft and Robbery Section ang tag-iya og usa ka security agency human kini kawati sa iyang mga butang sama  sa cell phone, cheque, cash ug alahas.

Si Kits Albano, 40, kinsa  maoy  biktima  mitumaw  kagahapon  sa Theft  and  Robbery Section  sa  kapolisan ug  mitug-an nga kaniadtong Hulyo 17, 2013  kini mahitabo.

Si Albano  kinsa  usa  ka tag-iya  og security  agency miingon  nga didto   siya sa iyang sakyanan nga nakig-estorya sa manager sa usa ka bangko nga nahimutang sa dalan Borromeo,  dakbayan  sa Sugbo.

Apan   wala  siya makabantay nga ang iyang bag nga puno  sa mga importanting  butang gikuha  sa  usa  ka 12-anyos nga bata  nga nailhan lang nga si Babao, uban sa laing 14-anyos nga si Takoy.

Gitug-an  sa biktima  nga  sa iyang paglingi,  ang iyang Gucci Bag nga original nahanaw na, hinungdan nga iya  kining  gipangita.

Tungod  kay wala  niya  hikit-i,  iya kining gisumbong   sa kapolisan  sa TRS diin didto nila masubay ang cell phone sa biktima ug ang duha ka suspetsado.

Sa pagsubay sa cell phone sa biktima nasayran nga gibaligya kini sa usa ka tindahan sa Colon apan ang mamaligyaay mihimakak usab niini.

Ang duha ka menor de edad nga dinakpan, mitug-an sa maong alegasyon batok kanila apan nagtinukmoray na kun kinsa kanila ang naghupot sa kwarta ug naglabay sa bag.

Ang 12-anyos nga si Babao, mipadayag usab nga aduna silay amo nga ginganlan og Liza, kinsa  maoy misugo  kaniya  sa pagpanulis.

Ang hepe sa kapolisan sa Theft and Robbery Section, Sr. Insp. William Alicaba mibutyag  nga  kadaghan  na  nila  maalarma  si Babao apan dili gihapon kini mapriso tungod sa iyang pagka menor de edad.

Nasagmuyo ang biktima  kay bisan usa sa iyang mga butang walay nahibalik, samtang dili  masilotan ang  mga dinakpan. (BANAT NEWS)