Dul-ang P200 mil balor sa nawagtang bantres

CEBU, Philippines - Dul-ang   P200 mil  ang kantidad sa usa ka libo kapin ka mga bantres  sa usa ka poultry farm nga  gikawat didto sa barangay Daanlungsod, lungsod  sa Alcoy    sa miaging  kaadlawon.

Ang nabiktima  mao ang K & K poultry farm nga gipanag-iya ni Lilian Nieves Nayga nga nagpuyo ra usab sa maong lugar.

Sa gipahigayung imbentaryo  mikabat  og 1,100 ka mga  manok  nga igbabaligya na, ang nasakiyo sa wala pa matumbok nga mga   kawatan,  nga gibana- banang mokantidad   og P161,560.00.

Si PO1 Joarvie Tomarse sa Alcoy Police Station mibutyag  sa Banat News   nga  dihang  gi- harvest  na  sa tag-iya  ang iyang  mga  manok  aron ideliver  sa ilang  suki,  namatikdan niini nga kuwangan na kini.

Dihang  ilang  gisusi,  nasakpan sa  tag-iya nga nawad-an kini og 1,100 ka   manok.

Dihang  gisukit  ang  mga  caretaker,   pulos  usab  kini nanghunaw.

Gi-apil  sa  nagpadayong imbistigasyon ang posibilidad sa inside job,  ang   maong pagpangawat.

Kini  tungod  kay   daghan kaayo ang mga manok nga nahanaw ug   wala  makatuo  ang  tag-iya  nga  di  masayran  sa iyang  mga  sinaligan  ang  maong  nangawagtang  nga  manok.

Hinuon  karong  anaa  na sa kapolisan  ang  kaso  gituohan  nga  masayran  ra  sa tag-iya  ang  kawatan. (BANAT NEWS)