Bandila sa NPA gisunog sa kanhi mga rebelde

SIATON, NEGROS ORIENTAL, Philippines — Gipangsunog sa mga rebel returnees kagahapon diha sa ilang lungsod ang  bandila sa New Peoples Army diha sa Negros Oriental agi og pagpakita sa ilang pagbalik sa sabakan sa gobiyerno.

Ang pagsunog sa bandila sa NPA gisaksihan sa 18 ka sakop sa Lubos Asosasyong Masa (LAM) diha sa sitio Quadra sa Barangay Mantiquil  sa Siaton   diha usab sila si Brgy. Chairwoman Rosalie Nama ug ang iyang mga konstituwente nga giingong buot nilang mamuyo nga malinawon.

Lakip sa mga mitambong mao sila si Mayor Albert Ator, Gov. Roel Ragay Degamo, 79th Infantry Battalion commander Col. Marion Sison ug 302nd Infantry Brigade deputy commander Col. Christopher Estella.

Duha ka kanhi mga rebeldeng NPA  nga mao sila si Engrid Casilaw,18, ug Bobby Kiskis,19, kinsa apil sa grupo sa mga NPA nga gikaengkwentro sa 79th IB niadtong May 13 Elections maoy nangulo sa pagsunog sa NPA flag  ug malipayong migakos sa Bandila sa Pilipinas uban sa uban pang mga rebel returnees.

Ang maong kalihokan gihimo dungan sa  usa ka medical mission nga gipasalamatan og dako sa mga residente tungod kay sukad nga masukad wala sila makatilaw niini nga serbisyo.

Ang LAM leader miingon nga giilad sila sa NPA nga nagpatoo kanilang nagsubay sila sa hustong dalan ug ang maong propaganda maoy nakaingon sa kabalaka, walay saktong katulog ug abnormal nga pagpuyo ilabi na kun makakita sila og mga sundalo.

Nanawagan karon sa iyang mga konstituwente nga nabutahan sa propaganda sa NPA nga dili na magpatonto pa tungod kay pulos lang problema maoy gihatag kanila sa NPA.

Si Estella sa iyang bahin miingon nga sama sa NPA, ang Armed Forces of the Philippines gikapoy na usab sa kapin 40 na ka tuig nga insurhensiya maong giusab nila ang ilang estratehiya pinaagi sa non-combat operations sama sa Bayanihan, kini gituyo aron mapaduol ang katawhan ngadto sa gobiyerno.

Sa iyang bahin, si Degamo mipasalig sa mga kanhi rebelde nga andam ang iyang buhatan sa pagsagop kanila ug sa uban pang buot mobalik sa gobiyerno, kinahanglan lang nga ilang ibutang sa kasingkasing ang tinud-anay nga kahulogan sa ilang pagpanumpa sa Bandila sa Pilipinas. (Juancho R. Gallarde sa The Freeman/EIM) (FREEMAN)