Pundo sa Alay Lakad sa Talisay ipasusi ni Basillote

CEBU, Philippines -  Ang chairman sa Committee on Education sa konseho sa dakbayan sa Talisay nga si Konsehal Dennis Basillote mopasusi sa nahibiling pundo sa Alay Lakad Foundation sa siyudad.

Si Basillote mangayo unta og pundo nga P250,000 gikan kang Kongresista Gerard Anthony “Samsam” Gullas sa unang distrito; P250,000 kang Gobernador Hilario Davide III ug P250,000 kang Talisay City Mayor Johnny De los Reyes alang sa Alay Lakad Foundation.

Apan niadtong Martes atol sa ilang regular nga sesyon gipahikling una ni Basillote ang iyang tulo ka mga resolusyon sa pagpangayo og pundo ngadto sa nahisgutang tulo ka mga opisyal.

Gipasabot ni Basillote nga buot niyang masayran kung pila na ang nahibiling pundo sa Alay Lakad una siya mangayo og laing pundo.

Ang pundo sa Alay Lakad itabang ngadto sa mga kabus nga mga estudyante aron makapadayon sila sa ilang pag-eskwela.

Gibutyag ni Basillote nga ang siyudad dunay 503 ka mga Alay Lakad scholars ug ang foundation magbayad og P3,000 matag semester sa matag scholar diha sa Talisay City State College. Ug kung mapalabang niya ang iyang resolusyon ug kung sila si Gullas, Davide ug De los Reyes mohatag sa pundong gipangayo nga mokabat tanan sa P750,000 diin daghan unya kaayong matabangang mga kabus nga estudyante.

Si Basillote midugang nga sa ilang caucus alang sa sunod nga sesyon ipaabot niya ang iyang  tumong sa pagpasusi sa city budget officer ug sa city social welfare kung pila na lang ang nahibilin nga pundo sa Alay Lakad. (BANAT NEWS)