Kanhi brgy. kapitan, luyo-luyong engr. na sa Mandaue

CEBU, Philippines - Gipalapdan ni kanhi  Pagsabungan Barangay Kapitan Andres Suson ang iyang serbisyo sa katawhan sa dakbayan sa Mandaue human siya  molingkod  isip bag-o nga Assistant City Engineer  sugod niadtong  Hulyo 1 niining tuiga.

Si  Suson nga usa ka civil engineer sa iyang propesyon maoy gitudlo ni Mayor Jonas Cortes  sa maong katungdanan human  ang kanhi assistant city engineer  Gregorio Omo miritero  sa iyang katungdanan.

 Nunot sa pag-asumer ni Engineer Suson sa maong katungdanan  gihulipan  siya  sa  iyang numero uno nga konsehal nga si Konsehal Asterio Bubble Suson.

Si Bubble Suson nga iyang ig-agaw  mao na karon  ang  barangay kapitan sa Pagsabungan.

Si Suson  mibutyag sa  Banat News   nga  padayonon niya  ang   mga maayong  proyekto ni Engineer Suson.

Matud pa niya nga iyang gihingusgan  karon  ang pagpatuman sa kalimpiyo sa   barangay pinaagi sa tukma nga paghipos sa mga basura gikan sa kabalayan.

Si Engineer  Suson nga nahinabi usab sa Banat News miingon nga nagkadaghan na  karon ang katawhan nga iyang giserbisyohan tungod kay kaniadto ang barangay Pagsabungan lang maoy  sentro sa iyang pagtagad.

Apan  karon nga siya  nay  ikaduhang  hepe  sa enhineriya  sa dakbayan,  labi  niyang  igmaton  ang  iyang  hunahuna  sa pag-atiman  sa bag-o  ug  dakong  tahas  nga  gisangon  kaniya  sa kagamhanan  sa siyudad. (BANAT NEWS)