Lalawigan mo-hire og medical staff
CEBU, Philippines - Magdugang ang Probinsya sa Sugbo og mga nurse ug medical staff sa mga district ug provincial hospital sa tibuok lalawigan.
Kini human makigtagbo ang mga chief nurse sa district ug provincial hospital ni Governor Hilario Davide III ug gihisgutan nila ang problema bahin sa kakuwang sa mga medical personnel.
Matud ni Davide, nga mga nurse maoy labing dakong problema nila sa mga ospital kay ang uban adunay medical equipment apan walay mopaandar.
Tungod niini, miingon si Davide nga iyang paninguhaon nga makadugang ang probinsya og tukmang mga medical staff sa mga district ug provincial hospitals.
Iya pa hinuong sutaon kun pila ka staff ang angay idugang base sa plantilla didto sa Provincial Health office.
Si Davide sa sayo pa nagkanayon sa iyang inaugural speech nga iyang panindoton ug pauswagon ang medical services sa probinsya nga anaa sa mga district ug provincial hospitals.
Apan matud niya nga angay ma-review ang proseso sa pag-hire og medical staff sa mga ospital sa probinsya.
Sa sunod semana, miingon si Davide nga liboton niya ang mga ospital aron masuta gyud niya ang mga kinahanglanon pa niini. (AJ De La Torre/WC) (BANAT NEWS)
- Latest
