Papa ug duha ka anak gidakop tungod kay namaligya’g shabu

CEBU, Philippines - Usa ka amahan ug duha ka anak niining lalaki ang gidakop sa mga sakop sa  Provincial Intelligence Branch (PIB) human kini masikop atol sa gihimong buybust operation sa kapolisan diha sa sitio Sambag San Vicente lungsod sa Lilo-an pasado alas 4 sa miaging hapon.

Ang mga nasikop mao sila si Hilario Atis, 63-anyos ang amahan uban sa anak niini nga silang Herwin Atis, 31, ug Norven Atis, 29, molupyo sa maong dapit.

Matud sa team leader sa Provincial Intelligence Branch sa maong operasyon, Sr. Insp. Leo Logroño  nga duha ka semana silang mi-surveillance sa subject nilang si Hilario. Dugang pa ni Logroño nga niadtong tuig 2004 nalambigit na sa ginadiling drugas ang amahan hinungdan nga ila na kini nga gipanid-an ug ning bag-ohay lang kini nga nahibalik sa maong ilegal nga negosyo.

Gihulagway usab ni Logroño nga bigtime drug pusher sa dapit ang mga dinakpan tungod kay makadispatsar kini og di mominos 20 ngadto sa 25 gramos nga ginadiling drugas kada semana.

Ang mga anak ni Atis mipadayag usab nga mitabang lang usab sila sa ilang amahan nga namaligya ug mangomisyon usab sila niini. Giingong miangkon usab silang tiggamitan sila og ilegal nga drugas.

Nakuha sa kapolisan gikan nila ang 25 ka medium packs; 23 ka gagmay’ng pakete; ug usa ka dakong pakete sa shabu, drug paraphernalia ug ingon man usa ka kalibre .22 revolver ug mga bala niini. (BANAT NEWS)