Suspek pagpatay sa striker sa RSOG7 napusilan nadakpan
CEBU, Philippines - Suspek sa pagpusil patay sa giingong striker sa Regional Special Operations Group- 7 ang nasikop sa kapulisan sa Ronda human kini gialarma kagabii sa Sitio Kasadya, Barangay Sta. Cruz.
Ang suspek nga si Richard Gimena gialarma human nagpabuto sa iyang .45 kalibre nga pistola mga ala 11:45 sa gabii.
Daling miabot ang kapulisan aron sa pagsikop sa suspek apan kalit lang kining nagpabuto maong gibawsan kini sa kapulisan.
Samdan sa dughan ug sa tuong sampot ang suspek ug daling gidala sa Vicente Sotto Memorial Medical Center.
Nakuha gikan sa suspek ang .45 nga pistola nga adunay magazine ug duha ka bala, usa ka gamay’ng pakete sa ginadiling drugas ug tin foil.
Ang suspek maoy gitumbok nga responsable sa pagpusil kang Richard Cajegas, 38, niadtong Hunyo 11.
Ang biktima paingon na sa buhatan sa RSOG gikan sa merkado dihang gipusil kini mga alas 10:00 sa buntag. (/EIM) (BANAT NEWS)
- Latest
