Dakong isda midunggo sa baybay sa Talisay

CEBU, Philippines - Naukay sayo kagahapon sa buntag ang mga residente  sa  Aznar beach, barangay Poblacion, dakbayan sa Talisay tungod sa usa ka dakung isda  nga  midagsa  ala 1:00 sa kadlawon  sa maong lugar.

Ang mga nakabangal sa maong isda mao ang lifeguard sa siyudad nga sila si Julieto Cañezres, Jingson Sabal, Ernesto Royo Jr., Francisco Alcontin, Jessie Campo, Michael Bustillo ug Paul Tabilon.

Ang maong mga lifeguard mibutyag sa mga tigbalita nga niadtong higayona nagtapok sila sa lugar tungod kay nagsaulog sila sa birthday sa usa sa ilang mga higala.

Apan  sa may dike, nakabantay sila nga adunay nagkapa-kapa ug nagtuo sila  nga tawo kini nga nangayo og panabang, apan usa diay ka dakung isda.

Matud sa mga lifeguard nga dali nilang gitawagan si Kagawad Gabriel Bonjoc sa Poblacion aron mapahibawo ang maong hitabo.

Si Bonjoc kinsa usa usab ka sakop sa media maoy mitawag sa ubang taga  media   aron magpatabang og contact sa mga opisyal sa siyudad ug  sa Bureau of Fisheries and Aquatic Resources (BFAR)-7.

Ang mga tigbalita misuway og tawag kang Konsehal Bernard Odilao kinsa maoy chairman sa committee on environment sa konseho sa Talisay apan dili ma-contact ang cell  phone niini.

Si Konsehal Danny Caballero kinsa usa sa natawagan ang daling miadto sa lugar ug mitabang usab kini og contact sa taga BFAR.

Ang  mga polis  nga  gipangulohan ni Inspector Margienette Yosores   uban  ni Rex Villavelez sa Talisay City Aquanauts ang miresponde sa hitabo.

Si Villavelez kinsa nagtuon usab kabahin sa marine life miila sa maong isda nga usa ka Sun Fish diin ang gibug-aton niini mikapin   sa 100 ka kilo.

Matud ni Villavelez nga ang Sun Fish adunay daghang klase ug tua  ang  daghan  niini  sa  nasud sa Indonesia kasagarang makita.

Si Dr. Jennefe Cabarubias, Veterinarian sa BFAR mikompirma usab nga ang maong isda usa ka Sun Fish ug pwede kining kaonon. (BANAT NEWS)