Loot mokiha sa pamilyang nagpalubong og minatay sa illegal nga mga sam-ang

CEBU, Philippines - Mopasaka og kasong kriminal si Daanbantayan Mayor Maria Luisa Loot batok sa mga tawong nagpalubong sa ilang mga minatay ngadto sa mga pribadong luna nga gihimong sementeryo nga wala mosunod sa balaod.

Sumala pa nga dunay ordinansa ang Daanbantayan nga Municipal Ordinance Nop. 13-2003 o “An ordinance regulating the establishments and operation of all cemeteries within the Municipality of Daanbantayan, Cebu, the prohibition on indiscriminate burials, the sale of disposition of burial rights inside Balingasag, Bitoon Municipal Cemetery and providing fees and revenues thereof.”

Apan nasuta nga bisan pa sa maong ordinansa duna gihapoy mga minatay nga gilubong sa mga sam-ang nga dili rehistrado sa munisipyo. Ang Daanbantayan adunay 42 ka mga sam-ang kaniadto apan 37 niini gipasirad-an tungod kay way mga permit.

Niadtong tuig 2007 usa ka imbestigasyon ang gihimo sa konseho sa Daanbantayan ug nadiskubrehan nga duna gyu’y mga pribadong sam-ang sa pipila ka mga barangay nga walay pagtugot gikan sa lungsod ug ingon man mga hingtungdang ahensya sa gobiyerno sama sa Department of Health ug sa Housing and Land Use Regulatory Board (HLURB).Nasuta usab nga dunay mga pipila ka nanag-iya og mga luna ang mihimo sa ilang mga lote nga pribadong lubnganan bisan walay barangay ordinance ug permiso sa HLURB ug sa munisipyo.

Matud pa ni Loot nga illegal ang pagpalubong sa maong mga minatay diha sa mga dili rehistradong mga sam-ang ug kalapasan kini sa Sanitation Code of the Philippines.Ang mga barangay nga dunay mga dili rehistradong pribadong sam-ang nga giingong padayong nagtugot nga kini lubngan og minatay mao ang Tapilon, Bateria, Malbago.

Ang Department of Health una nang mipagawas og pamahayag nga peligro sa panglawas sa mga tawo ang maong mga sam-ang tungod kay duol kaayo kini sa tinubdan sa ilang tubig.

Gisaway ni Loot ang iyang mga kaatbang sa politika nga sila si kanhi Hiram Binatero ug igsuong si councilor-elect Manuel Benatiro tungod sa alegasyon nga sila mismo ang mikuyog paghatud sa mga namatyan sa paglubong sa ilang mga minatay didto sa mga sam-ang nga dili rehistrado sa munisipyo.Matud pa nga ang gibuhat sa duha maoy kabahin sa ilang mga gipanaad atol sa kampanya, kini bisan pa man nga sila si Benatiro ug Vice Mayor–elect Gilbert Arrabis Jr. maoy usa sa mga nangusog kaniadto sa pag-regulate sa mga sam-ang.

Ang Banat News misuway sa pagkuha og komento gikan sa nahisgutang mga opisyal apan napakyas ang maong tinguha. (BANAT NEWS)