Hubog ug di kaantigo molangoy namatay

CEBU, Philippines - Tungod  sa kahubog  ug  dili  pa  gyud  kaantigo  molangoy usa  ka  tiguwang  ulitawo milutaw  sa dagat  ug namatay   didto sa Mahayahay Beach, sa  barangay  Poblacion, lungsod sa Argao niadtong Martes sa alas 2:30 sa hapon.

Ang biktima mao si Socrates Barbadillo, 52 ,ulitawo,  nga taga barangay  Poblacion Uno ,siyudad sa Carcar.

Si PO2 Renato Nacaytona sa Argao Police  Station mibutyag  sa Banat News    nga  ang biktima kauban sa iyang mga barkada nga taga siyudad sa Carcar   nagkasabot  nga mangaligo   didto  sa Mahayahay beach sa Argao.

Matud sa mga nakasaksi nga samtang nangaligo  ang  grupo nagpadayon  usab  og inom hangtod nga nangahubog.

Si Barbadillo katapusang nakit-an sa mga kauban  nga  nagsawom-sawom  sa dagat  bisan  dili  kaantigo  molangoy.

Matud  pa  sa  mga  kauban  nga  ila  kining gibadlong  apan  dili  gyud  patuo.

Paglabay sa pipila ka gutlo kalit lang kini  nga  nawagtang ug namatikdan  na lang  sa  mga  kauban nga naglutaw-lutaw  na sa dagat.

Busa  ila  kining  gisakwat  sa baybayon  ug  gihatud  ngadto  sa Kintanar  Memorial  Hospital  sa Argao  apan  gideklar  nga  patay  na  sa  pag-abot  didto. (BANAT NEWS)