Joavan gipaslak na sa CPDRC

CEBU, Philippines - Gipaslak  dayon  si Joavan Fernandez  sa prisohan  sa lalawigan  human  imando  sa huwes  sa Barili Regional Trial  Court (BRTC)  kagahapon sa buntag. Kini  human  ikasang-at  nga pormal  ang mga kaso  nga  Illegal Possesion of Firearm ug kalapasan sa Comelec Gun ban  ngadto  sa BRTC. Sa pakighinabi sa Banat News ni Insp. Henry Orbiso sa Moalboal Police  Station  nasayran nga didto  nila dad-a  si Joavan  sa sala ni RTC-Branch 10 Judge Leopoldo Cañete diin himoa ang inquest proceeding sa kasong ilang gisang-at.

Human niini, diha-diha  gipagawas  usab  dayon  ni  Judge Cañete ang commitment order   nga  nagrekomendar kang  Joavan  nga adto  kini  ibalhug  sa prisohan  sa   CPDRC  sa dakbayan  sa Sugbo.

Samtang  si acting provincial warden   nga si Sr. Insp. Dennis Aliño sa CPDRC miingon nga ilang ibutang si Joavan sa 2nd floor nga bahin sa CPDRC   aron bantang  kaayo  ug makita  kini  kanunay   sa jail guard.

Matud pa ni Aliño nga kanunayon nila  ang pagmonitor kang Joavan ilabi  na  giisip  kini  nilang  usa  ka high  profile  nga  piniriso.

Hinuon  matud  pa  ni  Aliño  nga  may  kauban  si Joavan  sa selda   nga laing tulo  ka  binilanggo  apan gipaniguro niya nga walay special treatment nga mahitabo sa anak sa mayor.

Samtang gipadayag usab ni Aliño nga ila pang bansayon si Joavan   sa sayaw  nga  nakapasikat  sa  mga piniriso  sa CPDRC  sa tibuok kalibotan isip  dancing inmates. 

Sa  laing  bahin  ang hepe sa kapolisan sa lalawigan sa Sugbo   nga si Sr. Supt. Patrocinio Comendador, mipadayag nga ilang gibutang si Joavan sa CPDRC  alang  sa seguridad  niini.

Ang duha ka bata-bata ni Joavan nga sila  si  Carlito Cañada ug Benito Sellon, kasamtangan kining gitanggong  sa Moalboal Police  jail. (BANAT NEWS)