Ancestral home natagakan sa backhoe napisat

CEBU, Philippines - Napiyapi  ang usa ka 150 anyos  na nga  ancestral house o karaang  balay human  kini matagaki sa usa  ka  backhoe nga nahunlak  gikan  sa gikargahan  niining ten wheeler truck didto sa National Highway, Brgy. Poblacion, lungsod sa Barili   sa miaging  hapon.

Ang maong  balay  gipanag-iya sa pamilyang Ricablanca  ug gitawag  kini  nga  Ricablanca Ancestral House nga karon gipanag-iya  na  ni Florante Ricablanca Alfanta, 59, ug nagpuyo sa nahisgutang balay.

Si PO3 Marianito Morales sa kapolisan sa Barili Police  Station nagkanayon  nga  ang  10 wheeler truck   nga gikargahan  sa backhoe gimaneho ni Mario Calago, 44, minyo, lumad nga taga Manlapay, lungsod sa Dumanjug.

Nasuta  nga  samtang  nagpaingon  sa habagatan  aron  ihatud  ang  maong  backhoe, pag-abot  sa ten wheeler  truck  sa maong  lugar  nakaligis  kini  og libaong  hinungdan  sa kalit  nga  pagtakilid  niini  samtang  nagdagan.

Gumikan   kay bug-at  ug  wala ikagaid  pag-ayo  ang  backhoe, dali kaayo  kining nahunlak sa pagtakilid  sa trak  ug didto  kini  motugpa  sa karaang balay  sa  mga Ricablanca  nga nahimutang  sa ubos  nga  bahin  sa karsada.

Hinuon  walay  nakalas nga  kinabuhi  sa maong  hitabo.

Gitun-an  pa sa  tag-iya  sa balay  kun  mopasaka  ba  sila  og  kaso  batok  sa nakaguba  sa ilang  ancestral  home. (BANAT NEWS)