Kiha ni Rama batok Osmeña ipadayon

CEBU, Philippines - Bisan og napilde na si Kongresista Tomas Osmeña ni Mayor Michael Rama apan iya gihapon nga ipadayon ang gipasaka niya nga kaso ngadto ni Osmeña.

Ang mao nga kaso naglambigit sa Dodge Charger vehicles nga gituohan ni Rama nga gidonar ngadto sa dakbayan sa tag-iya sa Bigfoot Entertainment apan giangkon  ni Osmeña nga  iyaha.  Ang kaso nga gipasaka ni Rama kang Osmeña pending pa karon anaa sa Office of the Ombudsman-Visayas apan ang mga anti-graft investigator miawhag na ni Rama nga mosumiter og dugang ebidensya. Si Atty. Jocelyn Pesquera, abogado ni Rama, miawhag niining tagsulat nga mopirma og pamahayag kabahin sa kasugiran sa nahisgutang Dodge Charger vehicles.

Si Rama mibasi sa iyang reklamo ni Osmeña sa balita sa The Freeman nga napublikar kaniadtong 2009 ug nagkutlo sa kanhi public information officer sa City Hall.

Sa maong balita si Nagiel Bañacia mitug-an nga nakurat kaayo si Osmeña pagkakita sa duha ka Dodge Charger nga police vehicles nga gigamit sa mga misugat kaniya didto sa Mactan International Airport sa paghiabot niya gikan nga nagpatambal sa Houston, Texas. Gitug-anan kaniadto ni Bañacia si Osmeña nga ang maong mga Dodge Charger nga police vehicle buot idonar ni Michael Gleissner sa dakbayan sa Sugbo aron gamiton pagpatrolya sa South Road Properties. Ang Bigfoot Entertainment miabang og duha ka ektarya nga luna  sa South Road Properties (SRP).

Si Gleissner gikataho nga wala na modayon sa pagdonar sa maong mga sakyanan diha nga nasayud nga ang pagka mayor ni Osmeña kutob na lang sa Hunyo 30, 2010.

Matud ni Osmeña nga anaa kang Rama ang “burden of proof” aron imatuod nga ang duha ka sakyanan gidonar gayud ni Gleissner sa kagamhanan sa dakbayan.

Ang duha ka Dodge Charger nga sakyanan gikataho nga gibaligya ra ni Gleissner ngadto ni Minnie Osmeña nga maguwang ni Kongresista Osmeña.  (BANAT NEWS)