Rama, Del Mar, Abellanosa giproklamar

CEBU, Philippines - Pormal na nga giproklama sa Board of Canvassers (BOC) si Mayor Michael Rama isip mananaug ug nagpabiling mayor sa dakbayan sa Sugbu.

Milanog ang abiba sa mga supporters sa Team Rama sulod sa Social Hall sa Cebu City hall human giproklamar ni BOC chairman ug Election Officer, Atty. Ferdinand Gujilde nga si Rama ang mananaog batok sa kaatbang niini nga si Kongresista Tomas Osmeña. Ang kadaugan giproklamar bisan pa man og naa pay tulo ka mga clustered precincts nga wala maka-transmit sa resulta human nihimo og manifestation ang abogado sa Team Rama nga si Atty. Jeneses Ponce.

Matud pa ni Ponce dili na maapsan ni Osmeña ang labaw ni Rama nga 6,376 ka botos bisan kang Osmeña pa mapunta ang tanang botos sa tulo ka clustered precincts nga dul-an 3 mil na lang ka botos nga iphunon.

Atol sa gipagawas nga initial official result sa BOC kagahapon sa alas 3:11 sa hapon, si Rama nakaangkon og 217,448 ka mga botos samtang si Osmeña anaa ray 211,072.

Ang mga clustered precincts nga  wala maka-transmit sa resulta mao ang precinct number 474 sa Barangay Mambaling;  #49 sa Cambinocot; ug # 150 sa Barangay Luz.

 Apil sa giproklamar kagabii mao ang mga kongresista sa syudad sa Sugbu, sa south district mao si Rodrigo Abellanosa samtang nabalik na sa north district si Raul del Mar nga pulos sakop sa Bando Osmeña Pundok Kauswagan (BOPK).

Giproklamar na usab nga mananaug nga konsehal sa Team Rama nga mao sila si Mary Ann delos Santos (north), James Cuenco ug si Dave Tumulak sa south.  Nasud usab sa top 8 sa pagkakonsehal sila si Nestor Archival, Alvin Arcilla, Bebs Andales, Lea Japson, Alvin Dizon, Nida Cabrera ug si Noel Wenceslao sa BOPK.  Nagkapyot pa usab si Jerry Guardo tungod kay sikit sila ni Wenceslao.

Samtang ang BOPK councilors sa south mao sila si Margot Osmeña, Gerry Carillo, Jun Gabuya, Hanz Abella (Team Rama), si Richie Osmeña. Nagbitay pa usab si Jun Pe tungod kay sikit sila ni Richie Osmeña.

Sa pikas bahin, kulbahinam ang karera sa pagka bise mayor tungod sa ka duol sa ligas sa mga boto tali sa mga kandidato sa maong posisyon.  Sa gipagawas nga partial official result sa BOC pasado alas-3 sa hapon kagahapon, si Edgar Labella nakakuha og 202,255 ka botos kontra sa 201,884 ka botos ni Joy Young.

Gitakda nga iproklama karung adlawa ang modaog pagka-bise mayor uban pa sa mga konsehales. (BANAT NEWS)