10 ka armado nadakpan

CEBU, Philippines - Napulo ka tawo nga gidudahang goons sa politiko ang nadakpan pasado ala- una sa kaadlawon sa barangay Panadtaran sa lungsod sa San Fernando.

Ang nasikop giilang sila si Maxim Alerta; Nimrod Parba; Joselito Cabigon; Lomar Quirante; Chester Delfin; Raymund Carubas; Evinicer Canas; Sherwin Marco; Kenneth Balduman ug Odilon Santa Rita.

Matud pa ni Lt. Col. Felix Mangyao ang Cebu Task Force commander sa AFP duna silay nadawat nga report kalabot sa mga armadong tawong nagpalibot sa usa ka politiko sa maong dapit maong ilaha kining gisusi.

Apan giingong kalit lang nga dunay butobuto sa armas nga nadungog sa lugar hinungdan sa nahitabong ginukdanay nga miresulta sa pagkasikop sa napulo ka tawo.

Nakuha sa kasundaluhan ang usa ka KG9 submachine pistol, ug kalibre .38 rebolber ug laing duha ka KG9s, tulo ka kalibre .45 pistola, ug dugang usa ka kalibre .38 usab ang narekober sa kapolisan.

Nagduda si Mangyao nga posibleng pagpanghudlat lang ang gihimo sa mga armadong tawo kini tungod usab kay kagahapon sa kaadlawon padayon pa ang canvassing.

Samtang ang hepe sa kapolisan sa lungsod sa San Fernando Sr. Insp. Gerard Pelare mipadaya’g nga ila pang gisuta kun kang kinsa nga politiko nagpaluyo ang maong mga armado. Dihang gisuwayan unta kini sa pagkuha sa ilang habig ang mga dinakpan igo lang usab miingon og "amo attorney lang estoryaha." (BANAT NEWS)