Joavan nadakpan na sab?
CEBU, Philippines - Naukay kagahapon ang mga tigbalita kabahin sa report nga gipakatap nga giingong ang anak ni Talisay City Mayor Socrates Fernandez nga si Joavan Fernandez nadakpan sa balay sa usa ka politiko sa lungsod sa Balamban.
Apan ang maong report nasuta nga walay kamatuoran.
Si Superintendent Elmer Lim, officer-in-charge sa Talisay City Police Station nga nahinabi sa Banat News kagahapon mibutyag nga nakadawat usab siya og susamang report hinungdan nga mitawag dayon siya ngadto sa hepe sa kapolisan sa Balamban pagsuta kung unsa kini ka tinuod.
Matud ni Lim nga gikompirma sa hepe sa Balamban Police Station nga dili tinuod ang maong report. Ang kapolisan adunay katahap nga adunay kalambigitan sa politika ang maong report nga gipakatap.
Sa laing bahin, ang kapolisan padayon pa gihapong nangita kang Joavan.
Kahinumdoman nga si Joavan nakaikyas gikan sa Talisay City detention cell niadtong Miyerkules sa gabii apan karon wala pa hisayri kun hain kini magtago.
Gani giawhag sa kapolisan ang publiko sa pagtaho sa ilang buhatan kun ilang hikit-an si Joavan. (BANAT NEWS)
- Latest
