Kandidato pagkamayor sa Cordova nahulga sa mga armado

CEBU, Philippines - Gibati og kabalaka sa iyang pamilya ang usa ka kandidato sa pagkamayor sa lungsod sa Cordova human kini makadawat og taho nga dunay mga armadong tawo nga magbahasbahas sa ilang panimalay ug tindahan. Si John Tan usa ka negosyante ug kandidato sa pagkamayor mitaho sa kapolisan nga duha na ka higayon nga dunay mga armadong tawo nga nagsige og pakita palibot sa iyang panimalay ug tindahan.

Matud pa ni Tan wala siya mahadlok sa maong hulga apan iyang gikabalak-an ang kahimtang sa iyang pamilya nga nahadlok sa maong sitwasyon.

“Kung kinsa ang mapilde, sports lang unta ug dili na lang mohimo og pagpanghulga kay wala sila mahadlok” matud pa ni Tan.

Apan ang kapolisan mipadayag nga wala silay nakitang armadong tawo sa maong dapit. Hinuon dunay mga report nga dunay mga kadudahang tawo nga dunay ‘nagbagal’ sa kilid nga makit-an sa maong lugar.

Samtang si Atty. Rudy Jumao-as, kandidato sa One Cebu ug Atty. Adelino “Addy” Sitoy kandidato sa Liberal Party sa pagkamayor sa mao gihapong lungsod pulos mihimakak sa maong alegasyon ug parehong mipadayag nga wala sa ilang linya ang pagmugna og kagubot.

Matud pa ni Sitoy ingon gyud niana ang reaksiyon sa bag-ong mosud sa politika diin bisan kasikas sa usa ka ilaga hatagan kini og dautang kahulogan. Sumala pa sa duha ilang gitahod ang ilang peace covenant nga ilang gilagdaan sa Parish Pastoral Council ug sa kapolisan sa lungsod sa milabay’ng semana. (/EIM) (BANAT NEWS)