Polis ug asawa nadisgrasya sa motor

CEBU, Philippines - Lima ang naangol lakip  ang  magtiayong  polis ug 4 anyos nga bata   dihang  misaliring  ang motorsiklo  nga  ilang  gisakyan  didto  sa barangay Mangoto sa lungsod sa Pinamungahan niadtong Martes  sa hapon.

Ang mga naangol mao ang drayber sa motorsiklo nga si POI  Jomar Guardiario, 28, minyo, ug sakop sa Regional Public Safety Batallion apan kasamtangang nadestino sa Pinamungahan Police Station  ug  ang iyang angkas nga asawa nga si Sheila Mae Solarte, 24.

Samtang ang uban pang na-angol mao sila si Rebecca Cardinas,  52, minyo, ug Adora Manguilimotan, 38,  minyo, ug ang anak niining 4 anyos nga si Gigi.

Samtang ang drayber  sa bus pasaheroan nga Bhokyol Trans mao si REnante Mantalaba Lopez, hingkod ang panuigon ug molupyo sa lungsod sa Aloguinsan.

Matud ni PO3 Renante Mahusay sa Pinamungahan Police  Station dihang nahinabi sa Banat   News   nga si  PO1 Guardiario ug ang asawa  niini gikan sa maong lungsod ug paingon unta sa Aloguinsan   ug  gikasugat  niini ang bus pasahero-an nga paingon sa syudad sa Sugbo.

Apan pag-abot sa kurbadahon nga bahin  sa dapit nga nahitaboan,   kalit  nga  milusot ang bus  pasaheroan sa gisundan  niining  sakyanan  busa  mikawat   kini sa pikas   linya ug nasaghiran ang  motorsiklo   sa polis.

Didto misaliring  ang  motorsiklo  dungan  sa pagkahagtos  o pagkawagtang  sa preno  niini  ug   midasmag sa mga biktima  nga naglakaw  nga sila si Cardinas, Manguilimotan ug  ang 4 anyos nga   si Gigi.

Human sa hitabo  gipanghatud   ang  mga biktima  ngadto  sa Pinamungahan District Hospital  apan gibalhin  sa Vicente Sotto Memorial Medical Center  sa dakbayan.

Samtang ang drayber sa bus pasaheroan natanggong na karon sa karsel ug gihikay  na  usab ang tukmang sumbong nga ipasaka batok   kaniya. (Darrel  A. Carumba/WC) (BANAT NEWS)