Bottled water nga tatak “TYPE O” gipanghatag sa Sugat sa Guadalupe
CEBU, Philippines - Taliwala sa pahimangno ug hangyo sa mga organizers nga dili mamulitika, nakalusot gyud ang mga botelya sa tubig nga may markang "Type O" ug "BOPK."
Gipang-apud-apud kini sa liboan ka mga mitambong sa Sugat Sa Guadalupe sa labing dako nga parokya sa dakbayan sa Sugbo.
Pagkahuman sa sugat, naabtan sa Banat News ang usa ka grupo nga nanghatag atubangan sa ganghaan sa simbahan ug usa ka Douglas Labra ang miangkon nga iya kining tampo sa partidong iyang gisuportahan.
"Kining akoa tabang ug suporta ni sa akong gituohang partido. Gikan ni sa akong kaugalingong bulsa," si Labra namahayag samtang nagtunol sa tubig sa matag moagi dihang gipangutana kung wala ba siya mabalaka nga matawag nga namulitika sa Sugat sa Guadalupe.
Si Labra nanag-iya sa usa ka meat shop diin siya naghatag sa binotelyang tubig nga gikarga sa usa ka multicab.Apan wala dangti og lima ka minutos human sa pakighinabi, kalit nga nanirado ang meat shop ug nahanaw ang sakyanan.
Ang pangulo sa Bando Osmena Pundok Kauswagan (BOPK) Kongresista Tomas Osmeña namulong nga ang pagpanghatag dili kini awtorisado sa ilang partido.
"I stopped it immediately when I was given and saw it myself. I was there. A salesman of some company tried to sell BOPK the idea. I said it can't be done during the campaign period. He said he would send me samples. That was over 2 weeks ago. I never heard about it ‘til someone handed me a bottle at about midnight," matud ni Osmeña.
"Those were samples I never ordered or worse, paid for. Yes, of course, I will warn them if they come back to me," panghimakak pa ni Osmeña. Pormal usab nga gipaila-ila sa Team Rama kagahapon ang ilang mga kandidato sa karaang balay ni Don Vicente Rama sud sa Rama compound.
Alas-7 sa buntag ipahigayon ang usa ka misa sa cathedral alang sa Team Rama , samtang ang BOPK adto magmisa sa Calungsod thanksgiving mass venue.
Sa laing bahin, usa ka grupo usab sa mga supporters sa usa ka independent senatorial candidate ang nagdala gyud og dakong tarpaulin nga nagdala sa pangalan niini ug nanghatag og leaflets diha sa atubangan gyud sa gate sa Saint Joseph Parish Church sa barangay Mabolo kagahapon. EIM (BANAT NEWS)
- Latest
